"Futzal Çempionatı 2025" -in qalibiləri ilə Azərbaycan Həmkarlar İttifaqları Konfederasiyasında görüş keçirilib

Azərbaycan Həmkarlar İttifaqları Konfederasiyasında (AHİK) bu günlərdə Avropa çempionatının qalibi olmuş Azərbaycan İdman Akademiyasının futzal komandası ilə görüş olub.

Tədbirdə Azərbaycan Həmkarlar İttifaqları Konfederasiyasının sədri Sahib Məmmədov idmançıları və onların məşqçilərini Avropa Universitetləri Futzal Çempionatda əzmkarlıq nümayiş etdirərək qızıl medal qazanmaları münasibətilə təbrik edib, onlara yeni qələbələr arzulayıb. Bildirilib ki, əsası Ulu Öndər Heydər Əliyev tərəfindən qoyulan gənclər və idman siyasəti hazırda cənab Prezident İlham Əliyevin rəhbərliyi ilə uğurla davam etdirilir. Aparılan məqsədyönlü siyasətin nəticəsidir ki, Azərbaycan idman və olimpiya hərəkatının inkişaf səviyyəsinə görə dünyanın aparıcı ölkələrindən biri hesab olunur. Konfederasiya sədri qazanılan uğurun ölkəmizdə idmana göstərilən dövlət qayğısının bariz nümunəsi olduğunu vurğulayıb.

Azərbaycan elm və təhsil nazirinin müavini, Azərbaycan Tələbə Futbol Federasiyası İctimai Birliyinin prezidenti Firudin Qurbanov komandanın uğurunda AHİK-in rolunu qeyd edib. Nazir müavini Akademiyanın futzal komandasının Xorvatiyada keçirilən çempionatda güclü rəqiblər üzərində qələbəsinin tarixi uğur olduğunu vurğulayıb.

Azərbaycan İdman Akademiyasının rektorunun müşaviri, Milli Olimpiya Komitəsinin vitse-prezidenti Fərid Mansurov isə ölkəmizdə idmana göstərilən diqqət və qayğıdan, bu sahənin inkişafı üçün yaradılan şəraitdən bəhs edib.

Komanda üzvləri görüşdə çempionat barədə təəssüratlarını bölüşüblər. Futzalçılar qarşıdakı yarışlarda da ölkəmizi layiqincə təmsil etmək və yeni uğurlar qazanmaq əzmində olduqlarını bildiriblər.

Qeyd edək ki, Azərbaycan İdman Akademiyasının futzal komandası Xorvatiyanın Zaqreb şəhərində tələbələr arasında keçirilən Avropa Universitetləri Futzal Çempionatında bütün rəqiblərini üstələyərək turnirin qalibi olub. Komandamızın oyunçusu Ağaseyid Seyidov isə çempionatın ən yaxşı qapıçısı seçilib. Komandamızın Avropa çempionatında iştirakı Azərbaycan Həmkarlar İttifaqları Konfederasiyasının, Azərbaycan Həmkarlar İttifaqları İdman Təşkilatları Assosiasiyasının, Elm və Təhsil İşçiləri Həmkarlar İttifaqının, eləcə də Azərbaycan İdman Akademiyasının və Azərbaycan Futbol Federasiyaları Assosiasiyasının dəstəyi, Azərbaycan Tələbə Futbol Federasiyası İctimai Birliyinin təşkilatçılığı ilə həyata keçirilib.

Azərbaycanlı tələbələr Avropa Futzal Çempionatının qalibi oldu

Xorvatiyanın Zaqreb şəhərində keçirilən Avropa Universitetləri Futzal Çempionatında ölkəmizi təmsil edən Azərbaycan İdman Akademiyasının komandası möhtəşəm nailiyyətə imza atıb.

Final görüşündə İspaniyanın Valensiya Universitetinin komandası üzərində 7:2 hesablı qələbə qazanan təmsilçilərimiz çempionatın qalibi olublar!

Ağaseyid Qasımov turnirin ən yaxşı qapıçısı seçilərək fərdi mükafata da layiq görülüb.

Qeyd edək ki, komandamızın Avropa çempionatında iştirakı Elm və Təhsil İşçiləri Həmkarlar İttifaqı , Azərbaycan Tələbə Futbol Federasiyası İctimai Birliyinin təşkilatçılığı, AFFA, Azərbaycan Həmkarlar İttifaqları İdman Təşkilatları Assosiasiyası və Azərbaycan İdman Akademiyasının dəstəyi ilə baş tutub.

Sertifikatlaşdırma imtahanında yüksək nəticə göstərmiş müəllimlər "Təhsil"də bir araya gəlib

21–27 iyul tarixlərini əhatə edən yay istirahət proqramı çərçivəsində ölkənin müxtəlif bölgələrindən seçilmiş, sertifikatlaşdırma imtahanında yüksək nəticə göstərmiş 50 müəllim Nabranda bir araya gəlib. Proqram Elm və Təhsil İşçiləri Həmkarlar İttifaqı (ETİHİ) və Azərbaycan Gənc Müəllimlər Assosiasiyasının (AGMA) birgə təşəbbüsü ilə həyata keçirilir.

İştirakçılar Nabrandakı “Təhsil” istirahət mərkəzində bir həftə ərzində həm istirahət edir, həm də müxtəlif maarifləndirici və sosial fəaliyyətlərə qatılaraq qarşıdan gələn dərs ilinə daha motivasiyalı və enerjili şəkildə hazırlaşırlar.

Proqram çərçivəsində intellektual yarışlar, stolüstü oyunlar, seminarlar, fikir mübadiləsi görüşləri və sosiallaşma imkanları təşkil olunur. Müəllimlər yaradılan şəraiti, təşkilatçılıq səviyyəsini və göstərilən diqqəti xüsusi minnətdarlıqla vurğulayırlar.

Elm və Təhsil İşçiləri Həmkarlar İttifaqı olaraq təhsil işçilərinin rifahını və sosial müdafiəsini prioritet hesab edir, gələcəkdə də onların dəstəklənməsi və əməkdaşlıq ruhunun gücləndirilməsi istiqamətində fəaliyyətimizi davam etdirəcəyik.

Azərbaycan komandası Avropa futzal çempionatında inamla irəliləyir

Xorvatiyanın Zaqreb şəhərində keçirilən tələbələr arasında Avropa Universitetləri Futzal Çempionatında ölkəmizi Azərbaycan Tələbə Liqasının 2024/2025 mövsümünün qalibi Azərbaycan İdman Akademiyasının komandası təmsil edir.

Komandamız iyulun 16-da Xorvatiyaya yola düşüb və qrup mərhələsində hər iki qarşılaşmada inamlı qələbə qazanaraq birinci yeri tutub. İsveçrə üzərində 5:1, ev sahibi Xorvatiya üzərində isə 6:2 hesabı ilə qələbə qazanan tələbə-idmançılarımız 1/4 final mərhələsinə yüksəlib və növbəti oyunda Fransa komandası ilə qarşılaşacaq.

Qeyd edək ki, komandamızın Avropa çempionatında iştirakına Azərbaycan Həmkarlar İttifaqları Konfederasiyasının üzv təşkilatı Elm və Təhsil İşçiləri Həmkarlar İttifaqı və tabe təşkilatı Azərbaycan Həmkarlar İttifaqları İdman Təşkilatları Assosiasiyası da dəstək göstərir.

Elm və Təhsil İşçiləri Həmkarlar İttifaqı gənclərin idmana cəlb olunmasını, onların beynəlxalq yarışlarda uğurla təmsil olunmasını prioritet hesab edir və bu istiqamətdə layihələri dəstəkləyir.

Azərbaycan Həmkarlar İttifaqları Konfederasiyası istirahət mərkəzlərinə mediatur təşkil edib

Azərbaycan Həmkarlar İttifaqları Konfederasiyası (AHİK) və üzv təşkilatı Elm və Təhsil İşçiləri Həmkarlar İttifaqı Respublika Komitəsi tərəfindən Azərbaycan Milli Mətbuatının yaranmasının 150 illiyi ilə əlaqədar Xaçmaz, Quba və Qusar rayonlarında yerləşən istirahət mərkəzlərinə mediatur təşkil olunub.

Mediaturun ilk dayanacağı AHİK-in üzv təşkilatı Dövlət İdarələri və İctimai Xidmət İşçiləri Həmkarlar İttifaqı Respublika Komitəsinin “Ülfət” istirahət mərkəzi olub. Bildirilib ki, mərkəzdə 7 kottec, 3 ikimərtəbəli və 1 birmərtəbəli korpus mövcuddur. Eyni vaxtda 125 nəfərin istirahəti üçün hər cür şərait yaradılıb. Müasir tələblərə cavab verən otaqlar TV, dayanıqlı internetlə təchiz olunub. İstirahət məkanında böyüklər və uşaqlar üçün hovuzlar, uşaq əyləncə mərkəzi, tennis kortu və voleybol meydançası fəaliyyət göstərir. Geniş yaşıllıq sahəsi və müasir infrastruktur ilə seçilən mərkəz ailəvi istirahət üçün olduqca əlverişlidir. Jurnalistlər istirahət edən ailələrlə görüşərək onların təəssüratlarını dinləyib, xidmət səviyyəsi ilə tanış olublar.

Sonra jurnalistlər AHİK-in üzv təşkilatı Azərbaycan Dəmiryolçularının Müstəqil Həmkarlar İttifaqı Respublika Komitəsinin “Lokomotiv” istirahət mərkəzinə gəliblər. Məlumat verilib ki, mərkəz 6 korpus və 6 kottecdən ibarət olmaqla 216 yerlikdir. Burada yeməkxana, idman zalları, minifutbol stadionu, tibb məntəqəsi, hovuzlar və uşaq əyləncə guşələri var. Media nümayəndələri həmkarlar ittifaqı üzvlərinin istirahət şəraiti ilə maraqlanıblar. Ümumilikdə, “Təhsil” istirahət mərkəzi 800 nəfərin eyni vaxtda istirahət etməsi imkanına malikdir.

Mediaturun növbəti ünvanı Qusar rayonunda yerləşən AHİK-in üzv təşkilatı Səhiyyə İşçiləri Həmkarlar İttifaqı Respublika Komitəsinin “Şəfa” istirahət mərkəzi olub. Burada üçmərtəbəli yataq korpusu, konfrans və fitnes zalı, uşaq və idman meydançaları, tibb xidməti, müasir kommunikasiya sistemləri və rahat yaşayış otaqları mövcuddur.

Mediatur iştirakçıları Elm və Təhsil İşçiləri Həmkarlar İttifaqı Respublika Komitəsinin Quba rayonunda yerləşən “Nazlı Bulaq” istirahət mərkəzində yaradılmış şəraitlə də tanış olublar. Bildirilib ki, mərkəzdə kotteclər və otel nömrələri, uşaq əyləncə zonaları, internet, çamaşırxana və digər xidmətlərlə təmin olunub. Təbii bulaq sularının sağlamlığa faydalı xüsusiyyətləri ilə də seçilən mərkəz həmkarlar ittifaqı üzvlərinin sevimli istirahət məkanlarındandır.

Yeni adımız: Elm və Təhsil İşçiləri Həmkarlar İttifaqı

Azərbaycan Təhsil İşçiləri Azad Həmkarlar İttifaqı fəaliyyətini artıq Elm və Təhsil İşçiləri Həmkarlar İttifaqı adı ilə davam etdirəcək.

Bu dəyişiklik elm sahəsində fəaliyyət göstərən təhsil müəssisələrinin, elmi-tədqiqat institutlarının, laboratoriyaların və elm yönümlü ali təhsil qurumlarının əməkdaşlarının təşkilatımızın fəal üzvləri olması faktını rəsmi və təşkilati baxımdan daha dəqiq ifadə etmək məqsədi daşıyır. Yeni adımız, elm və təhsil sahəsində çalışan əməkdaşların maraqlarını bir araya gətirən, onları daha geniş şəkildə əhatə edən yanaşmanı əks etdirir.

Elm və təhsil bir-birindən ayrılmaz sahələrdir. Bu iki sahənin ortaq dəyərləri üzərində möhkəm həmrəylik platforması quraraq, əməkdaşlarımızın hüquq və maraqlarının qorunmasına yönəlmiş fəaliyyətimizi daha da gücləndiririk.

Elm və Təhsil İşçiləri Həmkarlar İttifaqı olaraq üzvlərimizin yanında olmağa, onların əmək hüquqlarını, sosial təminatlarını və peşəkar maraqlarını qorumağa, birgə təşəbbüslərlə yeni və uğurlu addımlar atmağa davam edəcəyik.

Əmək və sosial təminat hüququ üzrə təlimlər uğurla yekunlaşıb

Azərbaycan Həmkarlar İttifaqları Konfederasiyasının Əmək və Sosial Münasibətlər Akademiyası (AƏSMA) və Azərbaycan Təhsil İşçiləri Azad Həmkarlar İttifaqları (ATİAHİ) Respublika Komitəsinin birgə təşkilatçılığı ilə həmkarlar ittifaqları təşkilatlarının sədrləri üçün keçirilən təlimlər uğurla başa çatıb.

30 iyun–3 iyul tarixlərində “Əmək qanunvericiliyinin tətbiqi problemləri” və 7–10 iyul tarixlərində “Sosial təminat qanunvericiliyinin tətbiqi problemləri” mövzularında keçirilmiş təlimlər iştirakçılara əmək hüququ və sosial təminat sahəsində mövcud normativ-hüquqi çərçivəni dərindən öyrənmək, qanunvericiliyin praktiki tətbiqi zamanı yaranan suallara aydınlıq gətirmək və peşəkar bacarıqları inkişaf etdirmək imkanı yaradıb.

Təlimlər Azərbaycan Respublikası Vəkillər Kollegiyasının üzvü, professor Mayis Əliyev və iqtisad elmləri doktoru, professor Rəsmiyyə Abdullayeva tərəfindən interaktiv formatda keçirilib. Əmək münasibətləri və sosial təminatla bağlı normativ-hüquqi aktların tətbiqinə dair həm nəzəri, həm də praktiki biliklər iştirakçılara əyani şəkildə izah olunub. Təlim iştirakçıları praktiki nümunələr üzərində işləməklə öyrəndiklərini möhkəmləndirmək imkanı qazanıblar.

Təlimlərin bağlanışında ATİAHİ sədr müavini Mirzə Cəfərzadə, şöbə müdiri Nigar Hacıyeva və AƏSMA-nın rektor vəzifəsini müvəqqəti icra edən Yusif Ağayev çıxış edərək təlimlərin əhəmiyyətini vurğulayıb, həmkarlar ittifaqlarında çalışan əməkdaşların hüquqi savadlılığının artırılmasının önəmini qeyd ediblər.

Sonda təlimləri uğurla bitirən iştirakçılara sertifikatlar təqdim olunub.

Laçında İqtisadi Əməkdaşlıq Təşkilatının Qadınlar Forumunun açılış mərasimi keçirilib

İyulun 2-də Laçın şəhərində “İƏT Həftəsi” çərçivəsində İqtisadi Əməkdaşlıq Təşkilatının Qadınlar Forumunun açılış mərasimi keçirilib.

Açılış mərasimində çıxış edən Ailə, Qadın və Uşaq Problemləri üzrə Dövlət Komitəsinin sədri Bahar Muradova, Azərbaycan Respublikasının Prezidenti cənab İlham Əliyevin təşəbbüsü ilə İqtisadi Əməkdaşlıq Təşkilatı çərçivəsində ilk dəfə olaraq İƏT Həftəsinin və Qadınlar Forumunun Qarabağ və Şərqi Zəngəzur iqtisadi rayonunda təşkil edilməsini tarixi hadisə adlandırıb. 

O, ölkəmizdə qadın sahibkarlığının inkişafı ilə yanaşı, qadınların təhsilə çıxışı, elmdə, texnologiyada, innovasiyada fəallığının artırılması sahəsində də ciddi nəticələr əldə edildiyini qeyd edib. Əlavə edib ki, Laçın da daxil olmaqla azad edilmiş bölgələrdə qadınların bilavasitə iştirakı ilə reallaşan sosial-iqtisadi layihələr bu siyasətin praktik nəticəsidir.

Azərbaycanın digər çoxtərəfli formatlar çərçivəsində olduğu kimi, İƏT müstəvisində də qadınların dayanıqlı inkişaf sahəsində əməkdaşlığın tərəfdarı olduğunu vurğulayan sədr, bu platformanı 2025-ci ildə başa çatan İƏT-in Baxış sənədinin davamı kimi və 2026–2035 dövrünü əhatə edəcək yeni inkişaf strategiyasının işlənib hazırlanmasında mühüm rol oynaya bilər.

Daha sonra İqtisadi Əməkdaşlıq Təşkilatının Baş katibinin müavini Silapberdi Nurberdiyev çıxış edərək, ev sahibliyinə və Forumun yüksək səviyyədə təşkilinə görə minnətdarlığını ifadə edib.

İƏT rəsmisi Forumun həm üzv dövlətlərin öz təcrübələrini bölüşməsi, həm də beynəlxalq təşkilatların töhfə verməsi baxımından mühüm platforma olduğunu qeyd edib. O, güclü iqtisadiyyatın və inklüziv cəmiyyətin qurulmasında, eləcə də dayanıqlı müqavimətin formalaşdırılmasında qadınların vacib rolunu vurğulayıb. S. Nurberdiyev, iqlim fəaliyyətində rəhbər səylərin gücləndirilməsini, həmçinin iqlim dəyişmələrinə qarşı mübarizə aparılmasında daha çox imkanların yaradılmasının vacibliyini bildirib. O, qadınların qeyri-ənənəvi sahələrdə biliklərin mənimsənilməsi və iştirakının artırılması üçün bir sıra planların olduğunu qeyd edib və əlavə edib ki, qarşıya qoyulan məqsədlərə nail olmaq üçün düzgün maliyyələşdirməni və məlumatları toplamağı təmin etməliyik.

İƏT rəsmisi qadınların elmi, texnoloji və riyazi sahələrdə iştirakı artırılmasını və gender əsaslı zorakılığın qarşısının alınması sahəsində daha tutarlı tədbirlər görülməsinin prioritet istiqamətlər olduğunu da diqqətə çatdırıb.

Daha sonra BMT Baş Katibinin müavini, BMT-nin Dayanıqlı İnkişaf Qrupunun Sədri Amina J. Mohammed və BMT Baş Katibinin müavini, BMT Asiya və Sakit Okean üzrə İqtisadi və Sosial Komissiyasının İcraçı Katibi Armida Salsiah Alisjahbananın video müraciətləri dinlənilib.

Özbəkistan Respublikasının Ailə və Qadın Komitəsinin sədri Zulayxo Maxkamovanın çıxış edərək bildirib ki, Forum İƏT regionuna daxil olan ölkələrin və beynəlxalq tərəfdaş dövlətlərin qadın rəhbərləri arasında konstruktiv dialoq, eləcə də gələcək əməkdaşlıq üçün etibarlı platforma çevriləcəkdir.

Özbəkistanda ailə və qadınların dəstəklənməsinə yönəlmiş Milli proqramın fəal və ardıcıl şəkildə həyata keçirildiyini vurğulayan Z. Maxkamova qeyd edib ki, bu proqram qadınların cəmiyyətdəki rolunun artırılmasına, qərarqəbuletmə proseslərində iştiraklarının və töhfələrinin gücləndirilməsinə, qadın sahibkarlığının və innovativ fəaliyyətin inkişafına, eləcə də resurslar və xidmətlərə geniş əlçatanlığın təmin edilməsinə yönəlib.

Sonra “Qızların təhsilinə dəstək gələcəyə sərmayədir” adlı film nümayiş etdirilib.

AzMİU-nun yaradılmasının 50-ci ilində təntənəli Məzun Günü — 2400-dən çox gənc yeni mərhələyə qədəm qoydu

Azərbaycan Memarlıq və İnşaat Universitetini (AzMİU) 2024/2025-ci tədris ilində başa vurmuş tələbələrin “Məzun Günü” münasibətilə möhtəşəm və yaddaqalan mərasim təşkil olunub. Universitetin 50 illik yubileyinə təsadüf edən bu önəmli tədbir 2025-ci il iyulun 1-də Bakı Kristal Zalında baş tutub. Tədbirə universitetin rəhbərliyi, akademik heyəti, tanınmış elm və ictimaiyyət xadimləri, dövlət qurumlarının nümayəndələri, məzunlar və onların valideynləri böyük ruh yüksəkliyi ilə qatılıb.

Tədbir AzMİU-nun Məzunlar Assosiasiyası, “Kristal Abşeron” və “Coca-Cola” şirkətlərinin dəstəyi ilə yüksək təşkilatçılıq səviyyəsində keçirilib. Zövqlü şəkildə hazırlanmış səhnə dekorasiyası, universitetin simvolları və 50 illik yubileyə həsr olunmuş vizual materiallar tədbirin təntənəli ovqatını tamamlayıb.

Mərasim Azərbaycan Respublikasının Dövlət Himninin səsləndirilməsi və Vətənimizin ərazi bütövlüyü uğrunda canlarını fəda etmiş şəhidlərin xatirəsinin bir dəqiqəlik sükutla yad olunması ilə başlayıb. Bu anlar gənclərin vətənə bağlılıq duyğularını daha da gücləndirib, onların yeni mərhələyə milli məsuliyyət hissi ilə qədəm qoyduqlarını simvolizə edib.

Universitetin rektoru, professor Gülçöhrə Məmmədova tədbirdə çıxış edərək məzunları ürəkdən təbrik edib, onların valideynlərini və müəllimlərini təhsil prosesindəki səylərinə görə xüsusi təşəkkürlə yad edib. O, AzMİU-nun ötən 50 ildə keçdiyi inkişaf yolundan danışaraq bu gün universitetin ölkənin aparıcı ixtisaslaşmış ali təhsil müəssisələrindən biri kimi tanındığını vurğulayıb. Rektor bildirib ki, 2024/2025-ci tədris ilində ümumilikdə 2422 nəfər tələbə universiteti uğurla bitirib. Onlardan 2301 nəfəri adi əsaslarla, 70 nəfəri isə fərqlənmə diplomu ilə məzun olub. Məzunlar sırasında 51 nəfər əcnəbi tələbə də yer alır ki, bu da AzMİU-nun beynəlxalq nüfuzunun və qlobal əməkdaşlıq imkanlarının göstəricisidir.

Bakalavriat səviyyəsini 1292 nəfər, magistratura pilləsini 631 nəfər tələbə başa vurub. Universitetin nəzdində fəaliyyət göstərən İnşaat Kollecinin 499 nəfər məzunu isə bu gün ali və orta ixtisas təhsili səviyyəsində peşəkar inkişaf yoluna çıxır. Eyni zamanda, AzMİU-nun həyata keçirdiyi beynəlxalq ikili diplom proqramı çərçivəsində bu il 6 tələbə məzun olub ki, onlardan 5-i Azərbaycan, 1-i Türkiyə vətəndaşıdır. Bu göstəricilər universitetin çoxpilləli, çevik və beynəlxalq yönümlü təhsil strategiyasının uğurla reallaşdığını təsdiqləyir.

Rektorun çıxışından sonra elm və təhsil nazirinin müavini İdris İsayev və AzMİU Məzunlar Assosiasiyasının İdarə Heyətinin sədri Nəriman Topçibaşev çıxış edərək məzunlara öz təbriklərini çatdırıblar, onlara gələcək fəaliyyətlərində uğurlar diləyiblər. Hər iki çıxışda AzMİU məzunlarının bilik və bacarıqlarının ölkəmizin gələcək inkişafı üçün əsas potensiallardan biri olduğu vurğulanıb.

Mərasimdə iştirak edən digər fəxri qonaqlar – Milli Məclisin Elm və təhsil komitəsinin sədri Anar İskəndərov, millət vəkili Aydın Mirzəzadə, BP-nin Xəzər regionu üzrə vitse-prezidenti Bəxtiyar Aslanbəyli, Dövlət Şəhərsalma və Arxitektura Komitəsi sədrinin müavini İlqar İsbatov və digər rəsmi şəxslər məzunları bu əlamətdar gün münasibətilə təbrik ediblər. Onlar AzMİU-nun yetişdirdiyi mühəndis, memar, dizayner və digər mütəxəssislərin Azərbaycanın sosial-iqtisadi inkişafında, xüsusilə də işğaldan azad olunmuş ərazilərdə aparılan yenidənqurma proseslərində mühüm rol oynayacağını qeyd ediblər.

Tədbirin rəsmi hissəsində universitet rəhbərliyi və qonaqlar tərəfindən müxtəlif fakültələri fərqlənmə ilə bitirən tələbələrə diplomlar təqdim olunub. Həmçinin təhsil müddətində ictimai fəallığı, innovativ təşəbbüsləri və sosial layihələrdə iştirakı ilə seçilən məzunlar xüsusi sertifikat və hədiyyələrlə mükafatlandırılıblar. Eyni zamanda, tədbirdə iştirak edən rəsmi şəxslər məzunlara fəxri fərmanlar, diplomlar və hədiyyələr təqdim ediblər ki, bu da onların əzmkarlığının və nailiyyətlərinin yüksək qiymətləndirilməsi kimi dəyərləndirilib.

Rəsmi hissədən sonra gəncləri əyləncəli və yaddaqalan bədii-musiqili proqram gözləyirdi. Tanınmış aparıcılar Abbasağa Əlizadə və Elcan Rəhimov tədbirə xüsusi ab-hava bəxş edib. Sevilən ifaçılar Orxan Zeynallı, Mərdan Kazımov, eləcə də DJ Kamonun təqdimatında səsləndirilən populyar mahnılar məzunlara unudulmaz anlar yaşadıb. Gənclər rəqs və coşqu içində təhsil həyatlarının bu əlamətdar mərhələsini qeyd ediblər.

Tədbirin kulminasiya nöqtəsi isə məzunların ənənəvi “papaqatma” mərasimi olub. Minlərlə papağın eyni anda havaya atılması universitetin tarixində simvolik bir səhifə kimi yadda qalıb və bu anlar rəsmi foto və video çəkilişlərlə əbədiləşdirilib.

Beləliklə, AzMİU-nun 50 illik yubileyi ərəfəsində keçirilən bu möhtəşəm “Məzun Günü” təkcə bir tədris ilinin sonu deyil, həm də universitetin nailiyyətlərinin, onun yetişdirdiyi gənc nəsil mütəxəssislərin və gələcək uğurların təntənəli nümayişi kimi tarixə düşüb.

“Nə? Harada? Nə zaman?” oyunu üzrə Tələbələrarası Azərbaycan Kuboku 2025 başa çatıb

26 iyun 2025-ci il tarixində "Nə? Harada? Nə zaman?" intellektual oyunu üzrə keçirilən “Tələbələrarası Azərbaycan Kuboku – 2025”in final mərhələsinə yekun vurulub.

Tədbir Gənclər və İdman Nazirliyi, Azərbaycan Respublikasının Gənclər Fondu, Azərbaycan Respublikası Gənclər Təşkilatları Milli Şurası və Azərbaycan Həmkarlar İttifaqları Konfederasiyasının üzv təşkilatı olan Azərbaycan Təhsil İşçiləri Azad Həmkarlar İttifaqının (ATİAHİ) dəstəyi ilə, “Xəzər” İntellektual Gənclər Klubunun təşkilatçılığı əsasında həyata keçirilib.

Ölkənin müxtəlif regionlarını təmsil edən 32 komanda arasında baş tutan final mərhələsində intellektual bilik və komanda ruhu üzrə rəqabət yüksək səviyyədə olub. Final mərhələsinin iştirakçıları Bakı şəhəri də daxil olmaqla ümumilikdə 9 regiondan və 28 ali təhsil müəssisəsindən seçilərək irəliləmiş 278 komanda arasından ən güclülər sırasında yer alıblar. Yarış cari mövsümdə 1800-dən çox tələbəni əhatə edib.

Final nəticələrinə əsasən:

1-ci yer – “Vendetta” komandası (Azərbaycan Dövlət Neft və Sənaye Universiteti)

2-ci yer – “Old School” komandası (Azərbaycan Tibb Universiteti)

3-cü yer – “HipHoprat” komandası (Azərbaycan Tibb Universiteti)

Tədbirdə ATİAHİ Respublika Komitəsinin sədri Araz Paşayev iştirak edib. O, çıxışında ölkədə intellektual fəaliyyətlərin gənclər arasında təşviq olunmasının əhəmiyyətindən bəhs edərək, təhsil işçilərinin həmkarlar ittifaqının bu istiqamətdə həyata keçirdiyi layihələrdə iştirakı və dəstəyi ilə bağlı fikirlərini bölüşüb.

Qalib komandalar diplom və xatirə hədiyyələri ilə təltif olunub.

ATİAHİ olaraq, elmə, intellektə və gəncliyə verilən dəyəri dəstəkləməyə davam edirik.

BSU-nun Məzun Günü tədbiri keçirilib

İyunun 25-də Bakı Slavyan Universitetində 2024/2025-ci tədris ilinin məzunlarına həsr olunmuş “Məzun Günü” tədbiri keçirilib.

Tədbirdə Azərbaycan Həmkarlar İttifaqları Konfederasiyasının üzv təşkilatı Azərbaycan Təhsil İşçiləri Azad Həmkarlar İttifaqının (ATİAHİ) Respublika Komitəsinin sədri Araz Paşayev də iştirak edib. ATİAHİ sədri Araz Paşayev çıxışında BSU-nun dövlətçilik ənənələrinə sadiq ali məktəb kimi yetişdirdiyi savadlı və vətənpərvər gənclərlə təhsil ailəmizin gücləndiyini vurğulayaraq, məzunlara peşəkar və mənəvi baxımdan dayanıqlı gələcək arzulayıb.

Tədbir çərçivəsində yüksək nailiyyətləri ilə fərqlənən məzun və müəllimlər təltif olunub, fakültə bayraqlarının təqdimatı və ənənəvi papaq atma mərasimi keçirilib.

“Effektiv ünsiyyət və aktiv dinləmə” mövzusunda təlim keçirilib

25 iyun 2025-ci il tarixində Azərbaycan Təhsil İşçiləri Azad Həmkarlar İttifaqının dəstəyi, Azərbaycan Mühasiblər və Risk Peşəkarları Assosiasiyasının (ARPA) təşkilatçılığı ilə komitə sədrləri və mütəxəssislər üçün “Effektiv ünsiyyət və aktiv dinləmə” mövzusunda təlim keçirilib.

Təlimin əsas məqsədi əməkdaşlar arasında ünsiyyət bacarıqlarının inkişaf etdirilməsi, emosional zəka və empatiya kimi yumşaq bacarıqların gücləndirilməsi və sağlam ünsiyyət mühitinin formalaşmasına töhfə vermək olub.

Təlim Fəxri İlham Məhəmmədzadə tərəfindən aparılıb. Təlim zamanı iştirakçılara emosional zəka (EQ) və intellektual zəka (IQ) arasındakı fərqlər, empatiya, aktiv dinləmə, problemlərin effektiv həlli mərhələləri, SCAMPER texnikası və kommunikasiya zamanı qarşılıqlı anlayışın artırılması yolları ilə bağlı məlumat verilib.

İştirakçılar təlimi interaktiv şəkildə dinləyərək həm nəzəri bilikləri, həm də real iş təcrübəsinə əsaslanan nümunələri müzakirə edib, seminarın sonunda isə sual-cavab sessiyası və praktik tapşırıqlar vasitəsilə mövzunu daha dərindən mənimsəyiblər.

Azərbaycan Təhsil İşçiləri Azad Həmkarlar İttifaqı və ARPA gələcəkdə də təhsil işçilərinin peşəkar inkişafı istiqamətində birgə təşəbbüsləri davam etdirməyi planlaşdırır.