Xəbərlər

Azərbaycan Rəssamlıq Akademiyasında "Məzun Günü – 2026" keçirilib

Azərbaycan Rəssamlıq Akademiyasında "Məzun Günü – 2026" tədbiri keçirilib. Məzunlar, müəllimlər, valideynlər və qonaqların iştirak etdiyi tədbirdə uzun illərin zəhməti, yaradıcılıq axtarışları və əldə olunan nailiyyətlər qeyd olunub.

Tədbirdə Azərbaycan Təhsil İşçiləri Azad Həmkarlar İttifaqı Respublika Komitəsinin sədr müavini Mirzə Cəfərov iştirak edib.

Mərasim çərçivəsində buraxılış yaradıcılıq işləri 100 balla qiymətləndirilən, həmçinin dörd il ərzində ixtisas üzrə ən yüksək akademik göstəricilər əldə edən 42 məzuna "Fəxri məzun" sertifikatları təqdim olunub. Sertifikatlar Azərbaycan Rəssamlıq Akademiyasının rektoru, Xalq rəssamı, professor Natiq Əliyev və tanınmış sənətkarlar tərəfindən məzunlara təqdim edilib.

Universitetin ictimai həyatında fəal iştirakına görə isə 5 məzun Elm və Təhsil İşçiləri Həmkarlar İttifaqı tərəfindən mükafatlandırılıb.

Tədbirdə Akademiyanın məzunlarından olan Əməkdar rəssam Faiq Əhməd çıxış edərək tələbəlik illərinə dair xatirələrini bölüşüb, gənc məzunları təbrik edib və onlara gələcək yaradıcılıq fəaliyyətlərində uğurlar arzulayıb.

Mərasim musiqi proqramı və bədii çıxışlarla davam edib, məzunlara unudulmaz anlar yaşadıb.

ETİHİ nümayəndələri Qırğızıstanda keçirilən regional seminarda iştirak ediblər

8-10 iyul 2026-cı il tarixlərində Qırğızıstan Respublikasının İssık-Kul vilayətində Beynəlxalq Əmək Təşkilatının (BƏT) və Qırğızıstan Respublikasının Təhsil və Elm İşçiləri Həmkarlar İttifaqının Mərkəzi Komitəsinin birgə təşkilatçılığı ilə “Təhsil işçilərinin hüquqlarının müdafiəsi: müasir şəraitdə həmkarlar ittifaqlarının rolu” mövzusunda regional seminar keçirilib.

Seminarda BƏT/ACTRAV-ın Avropa və Mərkəzi Asiya üzrə rəhbəri Serqius Qlovaskas, Qırğızıstan Həmkarlar İttifaqları Federasiyasının sədri Muradil Cumadilde, eləcə də Azərbaycan, Qazaxıstan, Qırğızıstan, Özbəkistan, Tacikistan və Türkmənistanın elm və təhsil işçiləri həmkarlar ittifaqlarının nümayəndələri iştirak ediblər.

Tədbirdə təhsil işçilərinin əmək hüquqlarının müdafiəsi, sosial dialoqun gücləndirilməsi, kollektiv danışıqların inkişafı, layiqli əməyin təşviqi, təhlükəsiz və sağlam əmək şəraitinin təmin edilməsi, beynəlxalq əmək standartlarının tətbiqi, həmkarlar ittifaqlarının müasir dövrdə rolu, təhsil sahəsinin müasir çağırışlara uyğun inkişafı və süni intellekt dövründə təhsil sisteminin transformasiyası məsələləri ətrafında geniş fikir mübadiləsi aparılıb.

İştirakçı ölkələrin elm və təhsil işçiləri həmkarlar ittifaqlarının nümayəndələri öz ölkələrində mövcud vəziyyət, əldə olunan nailiyyətlər və qarşıda duran çağırışlarla bağlı təqdimatlarla çıxış edib, BƏT-in konvensiyalarının təşviqi və tətbiqi istiqamətində təcrübələrini bölüşüblər.

Tacikistan nümayəndə heyətinin təşəbbüsü ilə region ölkələrinin birgə fəaliyyətini əlaqələndirəcək işçi qrupunun yaradılması təklifi irəli sürülüb və iştirakçılar tərəfindən maraqla qarşılanıb.

Sonda sosial tərəfdaşlığın gücləndirilməsi, əmək hüquqlarının müdafiəsi və beynəlxalq əmək standartlarının milli səviyyədə tətbiqinin vacibliyi vurğulanıb.

Qaxda Müəllimlərin VI Şəbəkələşmə Forumu keçirilib

Azərbaycan Gənc Müəllimlər Assosiasiyası və Şəki-Zaqatala Regional Təhsil İdarəsinin təşkilatçılığı, Elm və Təhsil İşçiləri Həmkarlar İttifaqının tərəfdaşlığı ilə 4 iyul 2026-cı il tarixində Qax rayonunda "Müəllimlərin VI Şəbəkələşmə Forumu: Müxtəliflikdə Birlik, Təhsildə Əməkdaşlıq" mövzusunda forum keçirilib.

Azərbaycanın müxtəlif bölgələrindən 600-dən çox məktəbəqədər, ümumi, orta ixtisas və ali təhsil müəssisələrinin pedaqoji heyətini bir araya gətirən forumun əsas məqsədi müəllimlər arasında peşəkar əməkdaşlığın gücləndirilməsi, təcrübə mübadiləsinin təşviqi, müasir təhsil yanaşmalarının paylaşılması və vahid peşəkar şəbəkənin inkişafına töhfə vermək olub.

Tədbir Azərbaycan Respublikasının Dövlət Himninin səsləndirilməsi və Vətən uğrunda canlarından keçmiş şəhidlərin əziz xatirəsinin bir dəqiqəlik sükutla yad edilməsi ilə başlayıb.

Forumun açılış mərasimində Azərbaycan Gənc Müəllimlər Assosiasiyasının sədri Pərvinə Qədimova və Şəki-Zaqatala Regional Təhsil İdarəsinin müdiri Günay Mahmudova çıxış edərək müəllimlərin peşəkar inkişafının dəstəklənməsinin, regionlararası əməkdaşlığın genişləndirilməsinin və təhsildə innovativ yanaşmaların tətbiqinin əhəmiyyətini vurğulayıblar.

Daha sonra Qax Rayon İcra Hakimiyyətinin başçısı Elvin Paşayev, Azərbaycan Respublikası Milli Məclisinin deputatı Ceyhun Məmmədov və Azərbaycan Respublikasının Təhsil İnstitutunun direktor müavini Fuad Qarayev çıxış edərək müəllim şəbəkələrinin inkişafı, təhsil sahəsində həyata keçirilən islahatlar və müasir dövrün çağırışları ilə bağlı fikirlərini bölüşüblər.

Forum çərçivəsində müasir təhsil gündəmini əhatə edən aktual mövzular üzrə mütəxəssis təqdimatları keçirilib. Təhsil Sisteminin İnformasiyalaşdırılması İdarəsinin rəis müavini Ayaz Abuşov "Təhsildə süni intellekt həlləri", Xəzər Universiteti Dünya Məktəbinin koordinatoru və "Valideyn məktəbi" layihəsinin rəhbəri Turab Əhmədov "XXI əsrdə məktəb-valideyn əməkdaşlığı", Azərbaycan Respublikasının Təhsil İnstitutunun aparıcı metodisti, Azərbaycan Gənc Müəllimlər Assosiasiyasının sədr müavini Səltənət Qurbanova "Uşaq hüquqları və təhlükəsizliyi", Azərbaycan Respublikasının Təhsil İnstitutunun aparıcı metodisti və AGMA-nın regional koordinatoru Validə Məmmədli isə "Universal Öyrənmə Dizaynı" mövzusunda təqdimatlarla çıxış ediblər.

Tədbirin bədii hissəsində Qax Rayon Uşaq-Gənclər İnkişaf Mərkəzinin "Buta" rəqs qrupu və Şəki Dövlət Regional Kollecinin "İpək qızlar" kollektivi milli rəqs və musiqi nömrələri ilə çıxış edərək forum iştirakçılarına zəngin bədii proqram təqdim ediblər.

Tədbirin sonunda forumun təhsil ictimaiyyəti arasında peşəkar əməkdaşlığın inkişafına, müəllimlərin təcrübə mübadiləsinin genişləndirilməsinə və müasir təhsil yanaşmalarının təşviqinə mühüm töhfə verdiyi vurğulanıb.

Forum kollektiv xatirə fotosunun çəkilməsi ilə başa çatıb.

Bakı Mühəndislik Universitetində “Məzun günü” keçirilib

Bakı Mühəndislik Universitetində (BMU) 2025/2026-cı tədris ili üzrə “Məzun günü” keçirilib.

Tədbirdə universitet rəhbərliyi, professor-müəllim heyəti, Abşeron Rayon İcra Hakimiyyətinin başçısı Abdin Fərzəliyev, Milli Məclisin komitə sədri Sadiq Qurbanov, deputatlar Rizvan Nəbiyev, Elçin Mirzəbəyli, Vüqar Bayramov, Elm və Təhsil İşçiləri Həmkarlar İttifaqının Respublika Komitəsinin sədri Araz Paşayev, YAP Abşeron rayon təşkilatının sədri Abbas Əliyev, məzunlar və valideynlər iştirak ediblər. Mərasim Ulu Öndər Heydər Əliyevin və şəhidlərimizin əziz xatirəsinin bir dəqiqəlik sükutla yad edilməsi və Dövlət Himninin səsləndirilməsi ilə başlayıb.

Açılış nitqi ilə çıxış edən BMU-nun rektoru Yaqub Piriyev məzunları təbrik edərək, ölkədə rəqəmsal transformasiya və yüksəkixtisaslı kadr hazırlığının prioritetliyini vurğulayıb, universitetin son illərdə QS reytinqlərində əldə etdiyi qlobal uğurlardan bəhs edib. Rektor bu il BMU-dan 1142 tələbənin məzun olduğunu, onlardan 75 nəfərinin fərqlənmə diplomuna layiq görüldüyünü diqqətə çatdırıb. Çıxış edən qonaqlar gənclərə dövlət tərəfindən yaradılan geniş imkanlardan danışaraq, məzunların azad olunmuş ərazilərin bərpa və quruculuq prosesinə, ölkənin inkişafına mühüm töhfələr verəcəklərinə əminliklərini ifadə ediblər.

Rəsmi hissədən sonra fəal məzunlar, fakültə birinciləri mükafatlandırılıb. Tədbir BMU-nun Bədii yaradıcılıq bölməsinin hazırladığı konsert proqramı, ənənəvi papaqatma mərasimi ilə yekunlaşıb.

Bakı Avrasiya Universitetində 30-cu Məzun Günü keçirilib

Bakı Avrasiya Universitetində ali təhsilini uğurla başa vurmuş tələbələr üçün 30-cu Məzun Gününə həsr olunmuş təntənəli tədbir keçirilib.

Tədbirdə universitet rəhbərliyi, dövlət qurumlarının nümayəndələri, akademik ictimaiyyət, professor-müəllim heyəti, tələbələr, məzunlar və onların valideynləri iştirak ediblər.

Mərasim Azərbaycan Respublikasının Dövlət Himninin səsləndirilməsi ilə başlayıb, Vətən uğrunda canlarından keçmiş şəhidlərin əziz xatirəsi bir dəqiqəlik sükutla yad edilib. Bakı Avrasiya Universitetinin şəhid məzunları Vüqar İsmayılov, Anar İsgəndərov və Şamxal Əlizadənin xatirəsi ehtiramla anılıb. Daha sonra universitetin fəaliyyəti, beynəlxalq əlaqələri və əldə etdiyi uğurları əks etdirən tanıtım videoçarxı nümayiş olunub.

Tədbiri giriş nitqi ilə açan universitetin rektoru, dosent Səyavuş Qasımov məzunları təbrik edərək onlara gələcək peşə fəaliyyətlərində uğurlar arzulayıb. Rektor universitetdə qazandıqları bilik və bacarıqların məzunların peşəkar inkişafına və ölkənin tərəqqisinə mühüm töhfə verəcəyinə əminliyini ifadə edib.

Rəsmi hissədə Milli Məclisin deputatı, professor Hikmət Məmmədov, Əmək Bazarı və Sosial Müdafiə üzrə Milli Observatoriyanın İdarə Heyətinin sədri Elnur Səfərli, Bakı şəhəri Nərimanov Rayon İcra Hakimiyyəti başçısının müavini İradə Muradova və Elm və Təhsil İşçiləri Azad Həmkarlar İttifaqları Respublika Komitəsinin sədri Araz Paşayev çıxış ediblər. Natiqlər məzunları təbrik edərək onlara gələcək fəaliyyətlərində uğurlar arzulayıb, müasir dövrün tələblərinə cavab verən peşəkar kadrların hazırlanmasının əhəmiyyətini vurğulayıblar.

Tədbir çərçivəsində universitetin beynəlxalq tərəfdaş ali təhsil müəssisələrinin rəhbərlərinin videomüraciətləri təqdim olunub. Niğde Ömer Halisdemir Universitetinin rektoru Hasan Uslu, İzmir Texnologiya İnstitutunun rektoru Yusuf Bayram və Qazax Milli Qadınlar Pedaqoji Universitetinin rektoru Beybitkül Kərimova Bakı Avrasiya Universitetinin məzunlarını təbrik edərək ali təhsil müəssisələri arasında əməkdaşlığın uğurla inkişaf etdiyini və gələcəkdə daha da genişlənəcəyinə inandıqlarını bildiriblər.

Mərasimin davamında yüksək akademik göstəriciləri ilə fərqlənən bakalavriat və magistratura səviyyələri üzrə məzunlar təltif olunub. Universitetin ictimai həyatında fəal iştirak edən tələbələrə, eləcə də ictimai fəaliyyəti ilə seçilən xarici tələbəyə təşəkkürnamələr təqdim edilib.

Azərbaycan Dövlət Pedaqoji Universitetində “Məzun Günü” keçirilib

İyunun 29-da Azərbaycan Dövlət Pedaqoji Universitetində (ADPU) “Məzun Günü” keçirilib. Mərasimdə universitet rəhbərliyi, struktur rəhbərləri, məzunlar və onların ailə üzvləri iştirak ediblər.

Rəsmi hissədə giriş sözü ilə çıxış edən ADPU-nun rektoru professor Cəfər Cəfərov məzunları təbrik edərək vurğulayıb ki, dövrümüzdə müəllim yalnız bilik ötürən deyil, öyrənən, yenilənən, texnologiyalarla ayaqlaşan şəxsdir. Bu yolun əsas dayaqları kimi milli dəyərlərə sadiqlik, peşə səriştəsi, daim yenilənən bilik və bacarıqlar, rəqəmsal və dil kompetensiyaları ön plana çıxır. Rektor qeyd edib ki, Pedaqoji Universitet müasir təhsilin tələblərini nəzərə alaraq bu yöndə davamlı işlər aparır, mövcud ixtisaslaşmaların təkmilləşdirilməsini həyata keçirir. Bilidirilib ki, ADPU beynəlxalq ali təhsil məkanında mövqeyini daha da möhkəmləndirir. Dünyanın nüfuzlu universitet reytinqlərində yer almağımız, beynəlxalq əməkdaşlıq şəbəkəmizin genişlənməsi və elmi fəaliyyət sahəsində əldə olunan nailiyyətlər Azərbaycan Dövlət Pedaqoji Universitetinin inkişafının göstəricisidir. C.Cəfərov bildirib ki, bu il ADPU və onun filalları üzrə 3300-dən çox bakalavr, 450-dək magistrant, Pedaqoji Kollec üzrə 1000-dən çox subbakalvr daxil olmaqla ümumilikdə 5000-ə yaxın təhsilalanın məzun olması gözlənilir. 

Çıxış edən Azərbaycan Elm və Təhsil İşçiləri Həmkarlar İttifaqı Respublika Komitəsinin sədr müavini Mirzə Cəfərzadə məzunları təbrik edərək bildirib ki, universitet illəri gənclərin peşəkar biliklərlə yanaşı, düşünmək, araşdırmaq, məsuliyyət daşımaq, komanda ilə işləmək və çətinlikləri dəf etmək bacarıqlarını formalaşdıran mühüm həyat məktəbidir. O qeyd edib ki, məzunlar bu gün təhsil aldıqları universiteti mütəxəssis kimi başa vurur, eyni zamanda həyata daha hazırlıqlı, daha yetkin və daha inamlı gənclər kimi qədəm qoyurlar.

M.Cəfərzadə professor-müəllim heyətinin gənclərin peşəkar və şəxsiyyət kimi formalaşmasında mühüm rol oynadığını, valideynlərin göstərdiyi dəstəyin isə bu uğurun ayrılmaz hissəsi olduğunu vurğulayıb.

Sədr müavini çıxışında müasir əmək bazarında texniki biliklərlə yanaşı, analitik düşüncə, liderlik, çeviklik, yaradıcılıq, ünsiyyət və komanda ilə işləmək kimi sosial bacarıqların xüsusi əhəmiyyət daşıdığını diqqətə çatdırıb. O bildirib ki, sürətlə dəyişən dünyada gənclərin ən böyük üstünlüyü qazandıqları biliklər, mənəvi dəyərlər, dürüstlük və insanlarla sağlam münasibətlər qurmaq bacarığıdır.

Çıxışının sonunda Mirzə Cəfərzadə Elm və Təhsil İşçiləri Həmkarlar İttifaqı Respublika Komitəsi adından məzunları bir daha təbrik edərək onlara möhkəm cansağlığı, peşə fəaliyyətlərində uğurlar və xoşbəxt gələcək arzulayıb.

Sonra universitetdə təhsil aldığı müddət ərzində yüksək akademik göstəriciləri və ictimai fəaliyyəti ilə fərqlənən bir qrup məzun Fəxri Fərmanla təltif olunub.

Bədii hissədə gənclərin sevimlisi olan müğənnillər – Mərdan Kazımov, Elçin Cəfərov və “Ayna Band” qrupunun ifaları “Məzun Günü”nə xüsusi rəng qatıb.

Azərbaycan Əmək və Sosial Münasibətlər Akademiyasında “Məzun günü” qeyd olunub

Azərbaycan Həmkarlar İttifaqları Konfederasiyasının (AHİK) Əmək və Sosial Münasibətlər Akademiyasında “Məzun günü” keçirilib.

Tədbirdə bakalavriat və magistratura səviyyələri üzrə təhsillərini başa vuran məzunlar, AHİK-in və üzv təşkilatların rəhbər şəxsləri, Akademiyanın professor-müəllim heyəti, valideynlər və qonaqlar iştirak ediblər.

Əvvəlcə Azərbaycan Respublikasının Dövlət Himni səsləndirilib. Daha sonra Ulu Öndər Heydər Əliyevin, həmçinin Vətənimizin ərazi bütövlüyü və suverenliyi uğrunda canlarından keçmiş şəhidlərimizin əziz xatirəsi bir dəqiqəlik sükutla yad olunub.

Tədbirdə çıxış edən AHİK sədrinin müavini Musa Mirzəyev məzunları təbrik edərək onlara gələcək fəaliyyətlərində uğurlar arzulayıb. Bildirilib ki, Azərbaycan Əmək və Sosial Münasibətlər Akademiyası müasir əmək bazarının tələblərinə uyğun, rəqabətqabiliyyətli və sosial məsuliyyətli mütəxəssislərin hazırlanmasında mühüm rol oynayır. Məzunlara təhsil müddətində əldə etdikləri bilik və bacarıqlardan səmərəli istifadə etmələri, ölkənin inkişafına töhfə vermələri və daim öz üzərlərində çalışmaları tövsiyə olunub.

Akademiyanın rektoru vəzifəsini icra edən Fərid Babayev və Elm və Təhsil İşçiləri Həmkarlar İttifaqı Respublika Komitəsi sədrinin müavini Mirzə Cəfərzadə çıxış edərək ali təhsil müəssisəsinin son illərdə əldə etdiyi nailiyyətlərdən, beynəlxalq əlaqələrinin genişlənməsindən, tədrisin keyfiyyətinin yüksəldilməsi və innovativ yanaşmaların tətbiqi istiqamətində görülən işlərdən bəhs ediblər.

Çıxışlarda cəmiyyətin tərəqqisində təhsilin rolu xüsusi vurğulanıb, məzunlara ölkəmizin sosial-iqtisadi inkişafında fəal iştirak etmələri tövsiyə olunub.

Sonda təhsildə və Akademiyanın ictimai həyatında fərqlənən məzunlara təşəkkürnamələr təqdim olunub.

Tədbir bədii hissə ilə davam edib.

ADNSU-da “Məzun Günü – 2026” keçirilib

İyunun 23-də Bakı Kristal Zalında Azərbaycan Dövlət Neft və Sənaye Universitetinin (ADNSU) “Məzun Günü – 2026” tədbiri keçirilib. Universitet rəhbərliyi, professor-müəllim heyəti, məzunlar, tələbələr, həmçinin dövlət qurumlarının və tərəfdaş təşkilatların nümayəndələrinin iştirak etdiyi tədbir Dövlət Himninin səsləndirilməsi və şəhidlərin xatirəsinin bir dəqiqəlik sükutla yad olunması ilə başlayıb.

Rəsmi hissədə ADNSU-nun 2025/2026-cı tədris ilindəki əsas nailiyyətlərini əks etdirən videoçarx nümayiş olunub. Daha sonra müxtəlif sahələrdə fərqlənən tələbələr mükafatlandırılıb və ənənəvi “İlin məzunu estafeti” təqdim edilib. Eyni zamanda, tədris ilini ən yüksək akademik göstəricilərlə başa vuran üç məzuna xüsusi hədiyyələr verilib.

Tədbirdə iştirak edən Elm və Təhsil İşçiləri Həmkarlar İttifaqı Respublika Komitəsinin sədr müavini Mirzə Cəfərzadə komitə adından məzunları təbrik edərək onlara gələcək fəaliyyətlərində uğurlar arzulayıb.

Gecənin bədii hissəsində ADNSU-nun “Gənclik” Mahnı və Rəqs Ansamblının, UFAZ-ın özfəaliyyət qrupunun və universitetin əcnəbi tələbələrinin rəngarəng çıxışları nümayiş etdirilib. Bayram tədbiri tanınmış ifaçıların iştirakı və konsert proqramı ilə davam edib.

ADMİU-da Məzun Günü qeyd olunub

22 iyun 2026-cı il tarixində Azərbaycan Dövlət Mədəniyyət və İncəsənət Universitetində Məzun Günü keçirilib.

Tədbir zamanı universitetin müxtəlif fakültələri üzrə fərqlənən tələbələr “İlin tələbəsi” nominasiyası ilə təltif olunublar. Eyni zamanda fakültələr üzrə pedaqoji fəaliyyəti və universitet həyatındakı aktiv iştirakı ilə seçilən müəllimlər də mükafatlandırılıb.

Məzun Günü çərçivəsində ADMİU-nun Musiqi sənəti fakültəsinin kafedralarında təhsil alan tələbələr bədii proqramla çıxış ediblər. Onların ifaları tədbir iştirakçıları tərəfindən maraqla qarşılanıb.

Tədbirdə Elm və Təhsil İşçiləri Həmkarlar İttifaqı Respublika Komitəsinin sədr müavini Turanə Kərimova iştirak edib. O, komitə adından məzunları təbrik edərək gələcək peşə fəaliyyətlərində uğurlar, yeni nailiyyətlər və davamlı inkişaf arzulayıb.

ETİHİ nümayəndələri Məktəblilərin Respublika İdman Olimpiadasının açılış mərasimində iştirak ediblər

İyunun 20-də Bakı Kristal Zalında ölkəmizdə ilk dəfə təşkil olunan Məktəblilərin Respublika İdman Olimpiadasının rəsmi açılış mərasimi keçirilib.

Açılış mərasimində dövlət rəsmiləri, media qurumlarının rəhbərləri, tanınmış idmançılar, ictimaiyyət nümayəndələri, həmçinin Elm və Təhsil İşçiləri Həmkarlar İttifaqı Respublika Komitəsinin sədri Araz Paşayev, sədrin müavini Mirzə Cəfərzadə və Respublika Komitəsinin məsul əməkdaşları iştirak ediblər.

Azərbaycan Respublikasının Dövlət Himninin səsləndirilməsi ilə başlayan mərasimdə ölkənin 59 şəhər və rayonunu təmsil edən məktəblilər bir araya gəlib. Bildirilib ki, olimpiadada 2000-dən çox məktəbli 21–26 iyun tarixlərində müxtəlif idman növləri üzrə mübarizə aparacaq.

Elm və Təhsil Nazirliyi və Gənclər və İdman Nazirliyinin birgə təşkilatçılığı, Bakı Şəhər Halqası Əməliyyat Şirkəti və müvafiq idman federasiyalarının dəstəyi ilə keçirilən olimpiada məktəblilər arasında sağlam həyat tərzinin təşviqi, idmana marağın artırılması, fiziki hazırlığın gücləndirilməsi və istedadlı gənclərin üzə çıxarılması baxımından mühüm əhəmiyyət daşıyır

ETİHİ-nin nümayəndələri İstanbulda keçirilən beynəlxalq təhsil forumunda iştirak ediblər

16–17 iyun tarixlərində Türkiyənin İstanbul şəhərində “Eğitim-Bir-Sen” həmkarlar ittifaqının təşkilatçılığı ilə beynəlxalq təhsil forumu – “İstanbul EdUnion Forum 2026” keçirilib.

Forumda Elm və Təhsil İşçiləri Həmkarlar İttifaqını Gəncə Şəhər Komitəsinin sədri Niyazi Nəbiyev və Xətai Rayon Komitəsinin sədri Sehran Səfərov təmsil ediblər.

“Qlobal qeyri-müəyyənliklər dövründə təhsil və əmək: ümumi çətinliklər və həll yolları” mövzusuna həsr olunan forumda 55 ölkədən 67 təhsil sahəsi üzrə həmkarlar ittifaqını, eləcə də beynəlxalq və regional təşkilatları təmsil edən 132 nümayəndə iştirak edib.

Açılış mərasimində çıxış edən “Eğitim-Bir-Sen” və “Memur-Sen” Konfederasiyasının sədri Ali Yalçın müasir dünyanın iqtisadi, ekoloji və texnoloji böhranlarını yalnız beynəlxalq həmrəylik və güclü sosial əməkdaşlıq sayəsində həll etməyin mümkün olduğunu bildirib.

Plenar iclasdan sonra “Qlobal böhran şəraitində təhsil və əməyin yeni modeli” və “Qeyri-müəyyənlikdən etimada doğru: qlobal həmrəylik və birgə həll yolları” mövzularında panel müzakirələri keçirilib. Bu müzakirələrdə müharibə, iqtisadi böhran, süni intellektin təhsilə və əmək bazarına təsirləri dəyərləndirilib, problemlərin həllinin yalnız beynəlxalq əməkdaşlıqla mümkün olduğu bildirilib.

Forumun ikinci günündə altı mövzu üzrə keçirilən panel iclaslarında isə təhsilin əlçatanlığı, müəllimlərin sosial müdafiəsi, rəqəmsal etika, inklüzivlik, qadınların və əlilliyi olan şəxslərin əmək bazarında dəstəklənməsi, həmçinin həmkarlar ittifaqlarının rolunun artırılması istiqamətində təkliflər irəli sürülüb.

Müxtəlif mədəniyyətləri təmsil edən nümayəndələr təhsilin dəyişdirici gücü və əməyin ümumbəşəri dəyəri ətrafında birləşərək ortaq baxışın formalaşdırılmasına töhfə veriblər.

Sonda forumun yekun sənədi – Bəyannamə qəbul edilib. Sənəddə təhsilin fundamental insan hüququ kimi qorunması, keyfiyyətli və inklüziv təhsilə çıxışın təmin edilməsi, təhsil işçilərinin hüquqlarının müdafiəsi, rəqəmsal transformasiyanın etik prinsiplər əsasında həyata keçirilməsi və qlobal həmrəyliyin gücləndirilməsi əsas prioritetlər kimi müəyyənləşdirilib.

Qeyd edək ki, 450 minə yaxın üzvü olan “Eğitim-Bir-Sen” Türkiyənin ən böyük təhsil işçiləri həmkarlar ittifaqıdır. Təşkilat 11 sahə həmkarlar ittifaqını və bir milyondan çox üzvü birləşdirən “Memur-Sen” Konfederasiyasının üzvüdür.

Gürcüstanda yaşayan azərbaycanlı gənclər üçün “Study in Azerbaijan” məlumat sessiyaları təşkil olunub

Təhsilin İnkişafı Fondunun (TİF) həyata keçirdiyi “Study in Azerbaijan” layihəsi çərçivəsində Gürcüstanda yaşayan azərbaycanlı gənclər üçün məlumat sessiyaları təşkil olunub.

Azərbaycan Respublikasının Gürcüstandakı səfirliyinin və Elm və Təhsil İşçiləri Həmkarlar İttifaqı Respublika Komitəsinin dəstəyi ilə keçirilən sessiyalar Gürcüstanda yaşayan azərbaycanlı məktəblilərin, tələbələrin və təhsil ictimaiyyəti nümayəndələrinin Azərbaycanın ali təhsil imkanları barədə məlumatlandırılması məqsədini daşıyıb.

13-14 iyun tarixlərində Qardabani, Marneuli və Bolnisi şəhərlərində keçirilən görüşlərdə 250-dən çox məktəbli, tələbə və müəllim iştirak edib. Sessiyalar Qardabani Təhsil və İnteqrasiya Mərkəzində, Marneulidə Azərbaycan Evində və Bolnisidə Qafqaz Hüquq və İnteqrasiya Mərkəzində baş tutub.

Görüşlər zamanı Azərbaycan Respublikasının Elm və Təhsil Nazirliyi yanında Elm və Ali Təhsil üzrə Dövlət Agentliyinin və “Study in Azerbaijan” layihəsinin nümayəndələri tərəfindən iştirakçılara Azərbaycanda ali təhsil almaq imkanları, bakalavriat və magistratura səviyyələri üzrə qəbul qaydaları, müraciət prosedurları, tələb olunan sənədlər, ixtisas seçimi, təhsil haqları və təqaüd imkanları barədə ətraflı məlumat təqdim edilib.

Eyni zamanda iştirakçıların sualları cavablandırılıb, onlara müraciət prosesinin mərhələləri və növbəti addımlar barədə praktiki tövsiyələr verilib. Sessiyalar çərçivəsində Azərbaycan ali təhsilinin beynəlxalq tələbələr üçün təqdim etdiyi akademik və sosial imkanlar da diqqətə çatdırılıb.

Qeyd edək ki, “Study in Azerbaijan” layihəsinin əsas məqsədi Azərbaycanda ali təhsil almaq istəyən əcnəbi vətəndaşlara məlumat və dəstək göstərmək, ölkənin ali təhsil imkanlarını beynəlxalq müstəvidə tanıtmaq və xarici tələbələrin Azərbaycan universitetlərinə cəlb edilməsinə töhfə verməkdir.