Xəbərlər

ETİHİ Respublika Komitəsinin növbəti regional görüşü Sabirabadda keçirilib

Azərbaycan Həmkarlar İttifaqları Konfederasiyasının (AHİK) üzv təşkilatı Elm və Təhsil İşçiləri Həmkarlar İttifaqı (ETİHİ) Respublika Komitəsinin növbəti görüşü Mil–Muğan regionu üzrə Beyləqan, İmişli, Saatlı və Sabirabad rayonlarında fəaliyyət göstərən təhsil müəssisələrinin həmkarlar ittifaqı komitələrinin iştirakı ilə keçirilib.

Tədbir 7 noyabr 2025-ci il tarixində Sabirabad rayonunda yerləşən Heydər Əliyev Mərkəzində baş tutub. Görüş Azərbaycan Respublikasının Dövlət Himninin səsləndirilməsi və şəhidlərin əziz xatirəsinin bir dəqiqəlik sükutla yad olunması ilə başlayıb.

Görüşdə ETİHİ Respublika Komitəsinin sədri Araz Paşayev, sədr müavini Mirzə Cəfərzadə, komitənin məsul əməkdaşları və 322 ilk həmkarlar ittifaqı təşkilatının sədrləri iştirak ediblər.

Araz Paşayev öz çıxışında üzv təşkilatlarla birbaşa dialoqun və qarşılıqlı əməkdaşlığın gücləndirilməsinin ittifaqın əsas fəaliyyət istiqamətlərindən biri olduğunu qeyd edib. O, üzv təşkilatların sosial layihələrdə iştirakı, təhsil müəssisələrində əmək münasibətləri, sosial təminat və maarifləndirmə istiqamətində görülən işlər barədə məlumat verib, həmçinin ittifaq üzvlərinin əmək, sosial və iqtisadi hüquqlarının müdafiəsi sahəsində AHİK və ETİHİ tərəfindən həyata keçirilən tədbirləri və bu istiqamətdə görülən işləri diqqətə çatdırıb.

Açıq dialoq formatında keçirilən görüşdə bir sıra aktual məsələlər müzakirə olunub, ilk təşkilat sədrlərinin sualları cavablandırılıb, onların rəy və təklifləri dinlənilib.

ETİHİ Respublika Komitəsi tərəfindən ilk həmkarlar ittifaqı təşkilatlarının sədrləri ilə görüşlər mərhələli şəkildə ölkənin digər şəhər və rayonlarında da davam etdirilməsi nəzərdə tutulur.

Qeyd edək ki, 405 mindən çox ittifaq üzvünü, 6 minə yaxın ilk təşkilatı və 146 üzv təşkilatı özündə birləşdirən Elm və Təhsil İşçiləri Həmkarlar İttifaqı Respublika Komitəsi AHİK-in üzv təşkilatıdır.

“ZəfərFest-5” yaradıcılıq festivalı keçirilib

Noyabrın 6-da Elm və Təhsil Nazirliyinin təşkilatçılığı ilə Heydər Əliyev Sarayında Vətən müharibəsinin 5-ci ildönümünə həsr olunmuş “ZəfərFest-5” yaradıcılıq festivalı keçirilib.

Festivalda dövlət rəsmiləri, millət vəkilləri, tanınmış mədəniyyət və incəsənət xadimləri, media qurumlarının rəhbərləri, təhsil mütəxəssisləri, şəhid övladları, təhsil müəssisələrinin pedaqoji, şagird kollektivləri və digər qonaqlar iştirak ediblər. 

Tədbirdə Elm və Təhsil Nazirliyi sistemində fəaliyyət göstərən uşaq-gənclər inkişaf mərkəzlərinin bədii özfəaliyyət kollektivləri, Azərbaycan Milli Konservatoriyası tərkibində İncəsənət Gimnaziyası, o cümlədən Cövdət Hacıyev adına 3 nömrəli onbirillik musiqi məktəbinin, “Sənət” Uşaq Musiqi və İncəsənət Mərkəzinin kollektivləri, ümumilikdə isə 400-ə yaxın məktəblinin iştirakı ilə ədəbi-bədii kompozisiyalar nümayiş olunub, məktəblilərin ifasında vətənpərvərlik mövzusunda şeir və mahnılar səslənib.

Qeyd edək ki, Vətən müharibəsindəki qələbəyə həsr olunan festival artıq 5-ci dəfədir ki, keçirilir və hər il gənclərin vətənpərvərlik ruhunun, yaradıcılıq bacarıqlarının nümayişi üçün mühüm platformaya çevrilib. 

Festivalın əsas məqsədi Vətən müharibəsi şəhidlərinin xatirəsini ehtiramla anmaq, Azərbaycan Ordusunun şanlı zəfəri və ölkəmizin ərazi bütövlüyünün bərpası uğrunda aparılan mübarizənin mahiyyəti barədə uşaq və gəncləri məlumatlandırmaqdır.

Tədbir, həmçinin, Vətən müharibəsində əldə edilmiş tarixi nailiyyətlərin, ordumuzun qəhrəmanlığının və bu zəfərin bütövlükdə türk dünyasının qələbəsi kimi əhəmiyyətinin gənc nəslə aşılanmasını nəzərdə tutur.

Azərbaycan Tələbə Liqasının 2025/2026 mövsümünə start verilib

Noyabrın 1-də ali təhsil müəssisələrinin tələbələri arasında futzal üzrə Azərbaycan Tələbə Liqasının 2025/2026 mövsümünə start verilib.

Liqanın A qrupunda mübarizə aparan Azərbaycan Dövlət Pedaqoji Universiteti və Bakı Mühəndislik Universitetinin komandalarının qarşılaşması olub, oyun 1:6 hesabı ilə başa çatıb. Daha sonra Azərbaycan Dövlət Neft və Sənaye Universitetinin komandası Azərbaycan Əmək və Sosial Münasibətlər Akademiyasının komandasına 6:0, Bakı Dövlət Universitetinin komandası Milli Aviasiya Akademiyasının komandasına 3:1 hesabla qalib gəlib.

Liqanın B qrupunda qarşılaşan Odlar Yurdu Universitetinin komandası Azərbaycan Memarlıq və İnşaat Universitetinin komandasına 0: 6 hesabla məğlub olub. Azərbaycan Dövlət İqtisad Universitetinin komandası Bakı Slavyan Universitetinin komandasına 7:1, Bakı Ali Neft Məktəbinin komandası Azərbaycan Tibb Universitetinin komandasına 4:0 hesabla qalib gəlib.

Qeyd edək ki, Azərbaycan Tələbə Liqası Elm və Təhsil Nazirliyi, Azərbaycan Tələbə Futbol Federasiyası İctimai Birliyinin təşkilatçılığı, Elm və Təhsil İşçiləri Həmkarlar İttifaqı Respublika Komitəsi, Azərbaycan Futbol Federasiyaları Assosiasiyasının dəstəyi ilə keçirilir.

14 ali təhsil müəssisəsinin komandasının mübarizə apardığı turnirə 2026-cı ilin may ayında yekun vurulacaq. Yarışlarda I, II, III yerləri tutan komandalar medal, pul mükafatı, çempion komanda kubok ilə, liqada fərqlənən 3 tələbə-futbolçu isə “Ən yaxşı qapıçı”, “Ən yaxşı müdafiəçi” və “Ən yaxşı oyunçu” nominasiyaları üzrə xüsusi mükafatla təltif olunacaq.

Liqanın keçirilməsində məqsəd ali təhsil müəssisələrinin tələbələri arasında futzal idman növünün təbliği, perspektivli idmançıların aşkar edilməsi, bu idman növünə marağın artırılması və tələbələrdən ibarət yığma komandanın formalaşdırılmasından ibarətdir.

ETİHİ Respublika Komitəsinin növbəti regional görüşü Salyanda keçirilib

Elm və Təhsil İşçiləri Həmkarlar İttifaqı (ETİHİ) Respublika Komitəsinin ilk həmkarlar ittifaqı təşkilatları ilə növbəti görüşü Salyanda baş tutub.

Görüş Biləsuvar, Hacıqabul, Neftçala, Salyan rayon və Şirvan şəhər komitələrinin ilk həmkarlar ittifaqı təşkilatlarının sədrləri ilə geniş tərkibdə keçirilib.

Salyan şəhər Heydər Əliyev Mərkəzində təşkil olunan tədbir Azərbaycan Respublikasının Dövlət Himninin səsləndirilməsi və şəhidlərin əziz xatirəsinin bir dəqiqəlik sükutla yad olunması ilə başlayıb.

Tədbirdə ETİHİ Respublika Komitəsinin sədri Araz Paşayev, sədr müavini Mirzə Cəfərzadə, komitənin məsul əməkdaşları və 244 ilk həmkarlar ittifaqı təşkilatlarının sədrləri iştirak edib.

Görüşdə ETİHİ Respublika Komitəsinin sədri Araz Paşayev üzv təşkilatlarla birbaşa dialoqun və əməkdaşlığın gücləndirilməsinin ittifaqın əsas prioritetlərindən biri olduğunu vurğulayıb. Həmçinin həmkarlar ittifaqının son illərdə həyata keçirdiyi sosial layihələr, üzv təşkilatların fəaliyyətinin gücləndirilməsi, əmək hüquqlarının müdafiəsi və maarifləndirmə istiqamətləri müzakirə olunub.

Sonda ilk təşkilat sədrlərinin sualları cavablandırılıb, onların təklifləri dinlənilib və qarşılıqlı fikir mübadiləsi aparılıb.

İlk həmkarlar ittifaqı təşkilatlarının sədrləri ilə görüşlər mərhələli şəkildə ölkənin digər şəhər və rayonlarında da davam etdiriləcək.

Qeyd edək ki, ETİHİ Respublika Komitəsi 405 mindən çox ittifaq üzvünü, 6 minə yaxın ilk təşkilat olmaqla 148 üzv təşkilatı özündə birləşdirir.

“Ağ ölüm” tamaşası nümayiş etdirilib

Azərbaycan Dövlət Milli Gənc Tamaşaçılar Teatrında Azərbaycan Həmkarlar İttifaqları Konfederasiyasının (AHİK) üzv təşkilatı Elm və Təhsil İşçiləri Həmkarlar İttifaqı (ETİHİ) Respublika Komitəsi və ETİHİ Nizami Rayon Komitəsinin birgə təşkilatçılığı ilə “Ağ ölüm” tamaşasının nümayişi keçirilib.

Tədbirdə ETİHİ Respublika Komitəsinin məsul əməkdaşları, Bakı şəhər üzrə rayon komitələrinin sədrləri və təhsil işçiləri iştirak ediblər.

Çıxış edən ETİHİ sədrinin müşaviri Vüsal Əliyev bildirib ki, “Ağ ölüm” tamaşası oktyabr ayı ərzində üzv təşkilatların təşəbbüsü ilə ölkə üzrə keçirilən “Narkomaniyaya və narkotik vasitələrin qanunsuz dövriyyəsinə yox!” devizi altında keçirilmiş maarifləndirici tədbirlər silsiləsinin yekun mərhələsidir. O, tamaşanın gənclər arasında sağlam həyat tərzinin təbliği baxımından mühüm rol oynadığını və bu kimi layihələrin cəmiyyətin mənəvi dayanıqlığının möhkəmlənməsinə xidmət etdiyini vurğulayıb.

Layihə AHİK və ETİHİ Respublika Komitəsinin birgə fəaliyyəti çərçivəsində sağlam həyat tərzinin təşviqinə, sosial məsuliyyətin artırılmasına və gənclərin mənəvi inkişafına yönəlib.

Tədbirin sonunda tamaşada çıxış edən aktyorlara ETİHİ Nizami Rayon Komitəsi tərəfindən təşəkkürnamə və gül dəstələri təqdim olunub.

Daha sonra tədbir iştirakçıları və yaradıcı heyət xatirə şəkli çəkdiriblər.

Gəncədə tələbələrlə maarifləndirici görüş keçirilib

ETİHİ Gəncə Şəhər Komitəsi tərəfindən Sənaye və Texnologiyalar üzrə Gəncə Dövlət Peşə Təhsil Mərkəzində tələbələrlə görüş keçirilib. 

Görüşdə ETİHİ Respublika Komitəsinin sədr müavini Mirzə Cəfərzadə, sədrin müşaviri – baş katib Pərvanə İsmayılova, Üzv təşkilatlarla iş şöbəsinin baş mütəxəssisi Ağca Məmmədova, eləcə də ETİHİ Gəncə Şəhər Komitəsinin sədri Niyazi Nəbiyev, Sənaye və Texnologiyalar üzrə Gəncə Dövlət Peşə Təhsil Mərkəzinin və Ticarət və Xidmət üzrə Gəncə Dövlət Peşə Təhsil Mərkəzinin tələbələri iştirak ediblər.

Tədbir Azərbaycan Respublikasının Dövlət Himninin səsləndirilməsi və şəhidlərin əziz xatirəsinin bir dəqiqəlik sükutla yad olunması ilə başlayıb.

Təqdimatla çıxış edən Mirzə Cəfərzadə həmkarlar ittifaqının fəaliyyəti, üzvlük imkanları və gənclər üçün həyata keçirilən sosial layihələr barədə ətraflı məlumat verib. 

Qeyd olunub ki, tələbələr həmkarlar ittifaqına üzv olmaqla ittifaqın sosial, hüquqi və təşkilati imkanlarından səmərəli şəkildə yararlana bilərlər. Onlara həmkarlar ittifaqı tərəfindən hüquqi yardımın göstərilməsi, sosial müdafiə tədbirlərində iştirakı və asudə vaxtlarının faydalı təşkili ilə bağlı geniş imkanların yaradıldığı vurğulanıb.

Tədbir zamanı tələbələri maraqlandıran suallar cavablandırılıb, müzakirələr aparılıb və görüşün sonunda tələbələr Elm və Təhsil İşçiləri Həmkarlar İttifaqına könüllü şəkildə üzv olmaq barədə qərar qəbul ediblər.

Qeyd edək ki, tədbir sabah da davam edəcək.

Şamaxıda ilk həmkarlar ittifaqı təşkilatlarının sədrləri ilə görüş keçirilib

Azərbaycan Həmkarlar İttifaqları Konfederasiyasının (AHİK) üzv təşkilatı Elm və Təhsil İşçiləri Həmkarlar İttifaqı (ETİHİ) Respublika Komitəsi tərəfindən Ağsu, İsmayıllı, Qobustan və Şamaxı rayonlarının ilk həmkarlar ittifaqı təşkilatlarının sədrləri ilə geniş tərkibli görüş keçirilib. Görüş Şamaxı Mədəniyyət Sarayında baş tutub.

Tədbir Azərbaycan Respublikasının Dövlət Himninin səsləndirilməsi və şəhidlərin əziz xatirəsinin bir dəqiqəlik sükutla yad olunması ilə başlayıb.

Tədbirdə ETİHİ Respublika Komitəsinin sədri Araz Paşayev, sədr müavini Mirzə Cəfərzadə, komitənin məsul əməkdaşları və 274 ilk həmkarlar ittifaqı təşkilatının sədrləri iştirak ediblər.

Görüş zamanı AHİK və ETİHİ-nin son bir ildə həyata keçirdiyi birgə fəaliyyət istiqamətləri barədə geniş təqdimat nümayiş olunub.

Sonda ilk təşkilat sədrlərinin sualları cavablandırılıb, onların təklifləri dinlənilib və qarşılıqlı fikir mübadiləsi aparılıb.

“Hənifə Məlikova-Zərdabi adına təqaüd proqramı 2025”in təqdimat mərasimi keçirilib

 “Gənc qızların təhsilinə dəstək” layihəsi çərçivəsində “Hənifə Məlikova-Zərdabi adına təqaüd proqramı”nın 2025-ci il üzrə təqdimat mərasimi keçirilib.

Məqsəd layihəyə yeni qoşulan, regionlar üzrə ən yüksək bal toplayan 93 tələbə qızla tanışlıq, eləcə də proqramın fəaliyyət istiqamətləri barədə məlumatlandırmanın təmin edilməsi olub. Tədbirdə dövlət qurumları, özəl sektor, ali təhsil müəssisələri və tərəfdaş təşkilatların nümayəndələri iştirak ediblər.

Dövlət himninin səsləndirilməsi ilə başlayan tədbirdə “Gənc qızların təhsilinə dəstək” layihəsinə həsr olunmuş videoçarx da nümayiş olunub.

Daha sonra Ailə, Qadın və Uşaq Problemləri üzrə Dövlət Komitəsinin sədri Bahar Muradova çıxış edərək layihənin ölkəmizdə qadınların təhsili və inkişafı istiqamətində atılan mühüm addımlardan biri olduğunu vurğulayıb. O qeyd edib ki, gənc qızların təhsilinə qoyulan sərmayə onların gələcəkdə cəmiyyətin sosial-iqtisadi inkişafında daha fəal iştirakına şərait yaradır. Bildirib ki, qadınların təhsil imkanlarının genişləndirilməsi ölkənin gələcək rifahı və dayanıqlı inkişafı baxımından prioritetdir.

Elm və təhsil naziri Emin Əmrullayev çıxışında qadınların təhsilinin cəmiyyətin inkişafını müəyyən edən əsas amillərdən biri olduğunu vurğulayıb. Nazir qeyd edib ki, qadınların rolu və inkişafı ilə təhsilin inkişafı arasında birbaşa əlaqə mövcuddur. Nazirin sözlərinə görə, qızların təhsilinə dəstək verilməsi yalnız fərdi inkişaf üçün deyil, həm də bütövlükdə cəmiyyətin tərəqqisi üçün böyük əhəmiyyət kəsb edir. Emin Əmrullayev bildirib ki, Azərbaycanda ali təhsil alan gənc qızların sayı ildən-ilə artır və bu, təhsildə bərabər imkanların təmin edilməsinə yönəlmiş siyasətin nəticəsidir. Nazir vurğulayıb ki, uzunmüddətli perspektivdə bu təşəbbüslər cəmiyyətin sosial strukturunda müsbət dəyişikliklər yaradacaq, çünki bu gün ali təhsil alan qızlar gələcəkdə təhsilli və müasir düşüncəli analar kimi yeni nəsillərin formalaşmasına töhfə verəcəklər.

Elm və Təhsil Nazirliyinin Təhsilin iqtisadiyyatı şöbəsinin müdiri, Təhsilin İnkişafı Fondunun İdarə Heyətinin sədr vəzifəsini müvəqqəti icra edən İlqar Bayramlı fondun qadınların təhsili istiqamətində həyata keçirdiyi layihələr barədə məlumat verib, “Hənifə Məlikova-Zərdabi adına təqaüd proqramı”nın davamlı təşəbbüslər sırasında olduğunu vurğulayıb.

Təqaüdçülər adından çıxış edən Bakı Dövlət Universitetinin tələbəsi Duyğu Əsgərli göstərilən dəstəyə görə təşəkkürünü bildirərək, bu proqramın onun kimi gənc qızlara yeni təhsil və inkişaf imkanları yaratdığını qeyd edib.

Təqaüdçülərin təltif edilməsi ilə davam edən mərasim bədii hissə ilə yekunlaşıb.

Qeyd edək ki, “Hənifə Məlikova-Zərdabi adına təqaüd proqramı” 2021-ci ildən etibarən həyata keçirilir və indiyədək 250-dən çox qız tələbənin təhsil və peşəkar inkişafına dəstək göstərilib. Layihə çərçivəsində regionlar üzrə ali məktəblərə yüksək balla qəbul olunmuş, aztəminatlı və həssas qruplardan olan qız tələbələrə dəstək göstərilir.

Ali təhsil müəssisələri arasında “Zəfər” şahmat turniri keçirilib

Azərbaycan Həmkarlar İttifaqları Konfederasiyasının (AHİK) dəstəyi, Elm və Təhsil İşçiləri Həmkarlar İttifaqı Respublika Komitəsi (ETİHİRK), Azərbaycan Həmkarlar İttifaqları İdman Təşkilatları Assosiasiyası və "Gənclik" Könüllü Tələbə İdman Cəmiyyətinin birgə təşkilatçılığı ilə ali təhsil müəssisələri arasında “Zəfər” şahmat turniri keçirilib.

Turnirin məqsədi tələbə idman hərəkatını gücləndirmək, ali təhsil müəssisələri arasında qarşılıqlı əməkdaşlıq mühiti yaratmaq, gənclərdə strateji düşüncə və komanda bacarıqlarını inkişaf etdirmək, Zəfər Günü münasibətilə milli qürur və vətənpərvərlik ruhunu möhkəmləndirməkdir.

Bakı İdman Sarayında keçirilən tədbirin açılış mərasimində Dövlət Himni səsləndirilib, şəhidlərimizin əziz xatirəsi bir dəqiqəlik sükutla yad edilib.

AHİK-in sədr müavini Musa Mirzəyev, Gənclər və İdman Nazirliyinin şöbə müdiri Elnur Məmmədov, Elm və Təhsil Nazirliyinin şöbə müdiri Elnur Əliyev və digər çıxış edənlər ölkəmizdə idmanın inkişafına göstərilən dövlət qayğısından, gənclər siyasətinin uğurlu icrasından bəhs edib, bu cür tədbirlərin gənclərin intellektual inkişafına, komanda bacarıqlarının formalaşmasına önəmli töhfə verdiyini vurğulayaraq iştirakçılara uğurlar arzulayıblar.

Sonra beynəlxalq dərəcəli hakim Fikrət Sideifzadə iştirakçıları turnirin qaydaları ilə tanış edib və yarışa start verilib. Yarışda 14 ali təhsil müəssisəsindən kişi və qadınlar ayrı olmaqla ümumilikdə 28 komanda iştirak edib. Turnir Rapid şahmat qaydalarına əsasən, İsveçrə sistemi üzrə 7 turda keçirilib.

Yarışın nəticələrinə əsasən, qadınlar arasında I yeri Azərbaycan Dövlət Neft və Sənaye Universiteti, II yeri Azərbaycan Dillər Universiteti, III yeri isə Azərbaycan Memarlıq və İnşaat Universitetinin komandaları tutub. Kişilər arasında isə I yeri Azərbaycan Memarlıq və İnşaat Universiteti, II yeri Bakı Ali Neft Məktəbi, III yeri Bakı Dövlət Universitetinin komandaları qazanıb.

Qalib komandalar kubok, medal, fəxri fərmanla təltif olunub, hədiyyələr verilib. 

Sumqayıt şəhərinin, Abşeron və Xızı rayonlarının ilk həmkarlar təşkilatlarının sədrləri ilə görüş keçirilib

Azərbaycan Həmkarlar İttifaqları Konfederasiyasının (AHİK) üzv təşkilatı Elm və Təhsil İşçiləri Həmkarlar İttifaqı (ETİHİ) Respublika Komitəsi tərəfindən Sumqayıt şəhərində ilk həmkarlar təşkilatlarının sədrləri ilə görüş keçirilib. Tədbir Sumqayıt Dövlət Universitetində (SDU) baş tutub.Görüşdən öncə tədbir iştirakçıları Sumqayıt Dövlət Universitetində Ulu Öndər Heydər Əliyevin büstünü ziyarət edib, abidəsi önünə gül dəstələri qoyublar.

Tədbirdə AHİK sədrinin müşaviri Cəmaləddin Quliyev, AHİK-in Üzv, Tabe Təşkilatlarla İş və Maarifləndirmə şöbəsinin müdiri İlahə Abbaszadə, ETİHİ Respublika Komitəsinin sədri Araz Paşayev, sədr müavini Mirzə Cəfərzadə, Respublika Komitəsinin məsul əməkdaşları və 214 ilk təşkilat sədrləri iştirak edib.

Tədbir Azərbaycan Respublikasının Dövlət Himninin səsləndirilməsi və şəhidlərin əziz xatirəsinin bir dəqiqəlik sükutla yad olunması ilə başlayıb.

Tədbiri giriş sözü ilə açan ETİHİ Respublika Komitəsinin sədr müavini Mirzə Cəfərzadə qeyd edib ki, bu cür görüşlər üzv təşkilatlarla birbaşa ünsiyyətin, qarşılıqlı fikir mübadiləsinin və əməkdaşlığın möhkəmlənməsinə xidmət edir.

Daha sonra çıxış edən AHİK sədrinin müşaviri Cəmaləddin Quliyev həmkarlar ittifaqlarının sosial-iqtisadi inkişafda və işçi hüquqlarının qorunmasında rolundan danışaraq, AHİK tərəfindən son illərdə həyata keçirilən sosial layihələr, əmək münasibətlərinin təkmilləşdirilməsi və üzv təşkilatlara göstərilən dəstək barədə məlumat verib.

AHİK-in Üzv, Tabe Təşkilatlarla İş və Maarifləndirmə şöbəsinin müdiri İlahə Abbaszadə çıxışında həmkarlar ittifaqlarında qadınların və gənclərin fəallığının artırılması, maarifləndirici təşəbbüslərin genişləndirilməsi və ilk təşkilat sədrlərinin sosial dialoqda iştirakının vacibliyini vurğulayıb.

Daha sonra ETİHİ Respublika Komitəsinin sədri Araz Paşayev AHİK və ETİHİ-nin son bir ildəki birgə fəaliyyətinə dair təqdimatla çıxış edib. Təqdimatda təhsil sahəsində çalışan ittifaq üzvlərinin sosial-iqtisadi hüquqlarının qorunması, asudə vaxt və istirahət imkanlarının genişləndirilməsi, beynəlxalq əməkdaşlıq və maarifləndirmə istiqamətində həyata keçirilən layihələr barədə ətraflı məlumat verilib.

Sonda ilk təşkilat sədrlərinin sualları cavablandırılıb, onların təklifləri dinlənilib və ətraflı fikir mübadiləsi aparılıb.

Təhsil işçiləri Push30 platformasına qoşuldu

Elm və Təhsil İşçiləri Həmkarlar İttifaqı Respublika Komitəsi (ETİHİ RK) təhsil sektorunda çalışan əməkdaşların sağlam həyat tərzini dəstəkləmək məqsədilə Push30 platforması ilə birgə pilot layihəyə başlayıb.

Push30 ölkə üzrə müxtəlif idman, fitness, yoga, pilates, üzgüçülük və sağlamlıq mərkəzlərinə vahid abunəliklə giriş imkanı təqdim edən platformadır. 

Pilot mərhələdə ETİHİ RK-ya üzv olan 3 000 nəfər təhsil işçisi üçün xüsusi güzəştli paketlər təqdim olunur:

• 3 aylıq “Standart” abunəlik – 120 AZN

• 3 aylıq “Plus” abunəlik – 300 AZN

Ödənişlər seçilən abunəlik növünə uyğun olaraq ayda 40 AZN (Standart) və ya 100 AZN (Plus) olmaqla taksit kartları ilə 3 ay ərzində hissə-hissə edilə bilər.

Layihənin təqdimatı Sea Breeze Event Hall-da keçirilib. Tədbirə ETİHİ-nin nümayəndələri və 500-dən çox təhsil işçisi qatılıb.

ETİHİ RK-nın sədr müavini Mirzə Cəfərzadə və Push30-un baş icraçı direktoru Adil Qasımov çıxış edərək iştirakçılara layihə barədə geniş məlumat veriblər. Azərbaycan Həmkarlar İttifaqları Konfederasiyasının cari ildəki fəaliyyəti ilə bağlı videoçarx təqdim edilib.

Push30 komandası iştirakçılara mobil tətbiq vasitəsilə qeydiyyat və istifadə qaydalarını izah edib.

Tədbirin rəsmi hissəsi başa çatdıqdan sonra əyləncəli proqram, furşet və hədiyyələr təqdim olunub.

ETİHİ Respublika Komitəsində BƏT nümayəndəsi ilə görüş keçirilib

Elm və Təhsil İşçiləri Həmkarlar İttifaqları (ETİHİ) Respublika Komitəsində Beynəlxalq Əmək Təşkilatının (BƏT) İşçilərin Fəaliyyəti Bürosunun (ACTRAV) Avropa və Mərkəzi Asiya üzrə rəhbəri Serqius Qlovaskas ilə görüş keçirilib.

Görüşdə əlaqələrin genişləndirilməsi, birgə layihələrin icrası və təhsil sektorunda sosial dialoqun gücləndirilməsi məsələləri müzakirə olunub.

Sonda BƏT nümayəndəsi layiqli əməyin prinsiplərinin və beynəlxalq əmək standartlarının təşviqinə verdiyi töhfələrə görə ETİHİ Respublika Komitəsini BƏT/ACTRAV-ın Fəxri Fərmanı ilə təltif edib.