Xəbərlər
20 nömrəli məktəb-liseydə müəllimlər gününə həsr olunmuş tədbir

Elm və Təhsil İşçiləri Həmkarlar İttifaqı Yasamal Rayon Komitəsi tərəfindən 5 Oktyabr – Beynəlxalq Müəllimlər Günü münasibətilə 20 nömrəli məktəb-liseydə təntənəli tədbir keçirilib.
Tədbirdə ETİHİ Yasamal Rayon Komitəsinin sədri, təcrübəli pedaqoqlar və gənc mütəxəssislər, habelə məktəb kollektivi iştirak ediblər.
Tədbir iştirakçıları əvvəlcə Ulu Öndər Heydər Əliyevin və ölkəmizin ərazi bütövlüyü uğrunda canlarından keçmiş şəhidlərimizin əziz xatirəsini bir dəqiqəlik sükutla yad ediblər.
Daha sonra bayram ab-havasında davam edən tədbirdə müasir təhsilin çağırışları, şagirdlərlə işin effektiv metodları və müəllim peşəsinin cəmiyyətdə tutduğu mühüm və şərəfli yer ətrafında fikir mübadiləsi aparılıb.
Tədbirdə çıxış edən ETİHİ Yasamal Rayon Komitəsinin sədri Rövşən İbrahimli müəllim peşəsinin əzəmətli və məsuliyyətli iş olduğunu qeyd edərək, qazanılmış bütün uğurların əsasında savadlı, qayğıkeş müəllimlərin dayandığını bildirib. O, həmkarlar ittifaqının təhsil işçilərinin hüquqlarının qorunması, maddi və mənəvi maraqlarının təmin olunması istiqamətindəki səylərini xüsusi vurğulayıb. Çıxışda təhsil işçilərinin sosial və əmək hüquqlarının hər zaman etibarlı şəkildə müdafiə olunmasının vacibliyi qeyd edilib.
Görüşün davamında təhsil və tərbiyə sahəsində uzun illər səmərəli fəaliyyət göstərən, gənc nəslin yetişməsində müstəsna xidmətləri olan pedaqoqlar ETİHİ Yasamal Rayon Komitəsinin Fəxri Fərman və dəyərli xatirə hədiyyələri ilə təltif olunublar.
Məktəb kollektivi göstərilən diqqət və qayğıya görə minnətdarlığını bildirərək, bu qəbil görüşlərin birlik və həmrəyliyi möhkəmləndirmək, eləcə də müəllim əməyinə layiqincə dəyər vermək baxımından böyük əhəmiyyət kəsb etdiyini vurğulayıb.
ETİHİ Yasamal Rayon Komitəsi fəaliyyət dairəsinə daxil olan müəssisələrdə Beynəlxalq Müəllimlər Günü münasibətilə silsilə tədbirləri davam etdirir, bütün təhsil işçilərinə möhkəm cansağlığı və şərəfli peşə fəaliyyətlərində yeni-yeni uğurlar arzulayır!





