Xəbərlər
5 Oktyabr – Müəllimlər Günü münasibətilə tədbir keçirilib

Elm və Təhsil İşçiləri Həmkarlar İttifaqı (ETİHİ) Nəsimi Rayon Komitəsi və Nəsimi Rayon İcra Hakimiyyətinin birgə təşkilatçılığı ilə 5 Oktyabr – Müəllimlər Günü münasibətilə tədbir keçirilib.
Tədbir Azərbaycan Respublikasının Dövlət Himninin səsləndirilməsi ilə başlayıb. Daha sonra Azərbaycanın ərazi bütövlüyü uğrunda canlarından keçmiş şəhidlərin əziz xatirəsi bir dəqiqəlik sükutla yad edilib.Ardınca müəllimlik peşəsinə həsr olunmuş videorolik nümayiş etdirilib. Tədbirin davamında iştirak edən qonaqlar çıxış edərək müəllimlik peşəsinin cəmiyyətdəki əhəmiyyətindən, müəllim əməyinin əvəzsizliyindən və gənc nəslin formalaşmasında müəllimlərin mühüm rolundan bəhs ediblər.
Nəsimi Rayon İcra Hakimiyyəti başçısının birinci müavini Gülarə Verdiyeva çıxışında müəllimlik peşəsinin cəmiyyətin inkişafındakı mühüm rolunu vurğulayıb. O, müəllim əməyinin əvəzsiz olduğunu qeyd edərək, yetişən nəslin formalaşmasında, onların bilik və dünyagörüşünün inkişafında, eləcə də cəmiyyətin müxtəlif sahələrində müəllimlərin mühüm xidmətlər göstərdiyini bildirib.
Səfərbərlik və Hərbi Xidmətə Çağırış üzrə Dövlət Xidmətinin Bakı şəhəri Nəsimi rayon idarəsinin rəisi Ceyhun Əliyev müəllimləri peşə bayramı münasibətilə təbrik edib. Çıxışında gənc nəslin vətənpərvərlik ruhunda formalaşmasında müəllimlərin xüsusi rolunu vurğulayan Ceyhun Əliyev təhsil və hərbi-vətənpərvərlik tərbiyəsi istiqamətində həyata keçirilən fəaliyyətin əhəmiyyətindən danışıb və müəllimlərə uğurlar arzulayıb.
ETİHİ Nəsimi Rayon Komitəsinin sədri Reyhan Ocaqova çıxış edərək rayonun üzv təşkilatlarında fəaliyyət göstərən bütün müəllimləri 5 Oktyabr – Müəllimlər Günü münasibətilə təbrik edib. Müəllim əməyinin yüksək dəyərindən söz açan Reyhan Ocaqova müəllimlərə həsr etdiyi şeiri səsləndirib. O, müəllimlərə bu şərəfli və məsuliyyətli fəaliyyət yolunda möhkəm cansağlığı, uğurlar və yeni nailiyyətlər arzulayıb.
Bakı şəhəri Nəsimi rayonu 46 nömrəli tam orta məktəbin direktoru Sevinc Budaqova çıxışında müəllim əməyinin gələcək nəsillərin formalaşmasındakı mühüm rolundan bəhs edib. O, müəllimlik peşəsinin yüksək məsuliyyət, fədakarlıq və böyük mənəvi dəyərlər tələb edən şərəfli fəaliyyət sahəsi olduğunu diqqətə çatdırıb.
Tədbir 5 nömrəli Uşaq Gənclər İnkişaf Mərkəzi şagirdlərinin ifasında təqdim olunan musiqi və rəqs nömrələri ilə davam edib.Şagirdlərin hazırladıqları bədii kompozisiyalar tədbir iştirakçıları tərəfindən maraqla qarşılanıb.
Tədbirin sonunda ETİHİ Nəsimi Rayon Komitəsinin üzv təşkilatlarında sertifikasiya imtahanlarında yüksək nəticələr göstərən müəllimlər, həmçinin 60 və 65 illik yubileylərini qeyd edən təhsil işçiləri təltif olunublar. Təltif olunanlara Rayon Komitəsi tərəfindən Fəxri Fərman və qiymətli hədiyyələr təqdim edilib.
Bununla yanaşı, Vətən müharibəsində iştirak etmiş təhsil işçiləri də Səfərbərlik və Hərbi Xidmətə Çağırış üzrə Dövlət Xidmətinin Bakı şəhəri Nəsimi rayon idarəsi tərəfindən Fəxri Fərman və qiymətli hədiyyələrlə təltif olunublar. Təltiflər Ceyhun Əliyev tərəfindən təqdim edilib.
Tədbir müəllim əməyinə göstərilən yüksək ehtiramın, təhsil işçilərinə verilən dəyərin, eləcə də gənc nəslin vətənpərvərlik ruhunda yetişdirilməsi istiqamətində həyata keçirilən birgə fəaliyyətin növbəti nümunəsi kimi yadda qalıb.





























