Xəbərlər
7 Oktyabr – Ümumdünya Layiqli Əmək Günü

7 oktyabr – Ümumdünya Layiqli Əmək Günü münasibətilə ETİHİ Astara Rayon Komitəsi tərəfindən təhsil işçilərinin əmək hüquqlarının müdafiəsi, layiqli və təhlükəsiz əmək şəraitinin təmin olunması, əmək münasibətlərində sosial ədalət və həmrəyliyin gücləndirilməsi məqsədilə silsilə maarifləndirici tədbirlər keçirilmişdir.
Tədbirlər Astara şəhəri Mirzə Ələkbər Sabir adına 1 nömrəli, Şıxəli Qasımov adına 4 nömrəli, Fərman Əliyarov adına 6 nömrəli tam orta məktəblərdə, eləcə də Aqşin Hüseynov adına Suparibağ kənd və Rəhman Babayev adına Hamoşam kənd tam orta məktəblərində təşkil olunmuşdur.
Görüşlər zamanı iştirakçılara layiqli əməyin mahiyyəti, təhlükəsiz və sağlam əmək şəraitinin əhəmiyyəti, işçilərin əmək, sosial və iqtisadi hüquqlarının qorunması, məcburi əməyin və uşaq əməyinin yolverilməzliyi, yetkinlik yaşına çatmayanların əmək hüquqlarının müdafiəsi, əmək münasibətlərində ayrı-seçkiliyin qarşısının alınması və ailə öhdəliklərinin bölüşdürülməsi ilə bağlı məsələlər barədə ətraflı məlumat verilmişdir.
Tədbirlərdə çıxış edənlər Ümumdünya Layiqli Əmək Gününün əhəmiyyətindən, ölkəmizdə əmək hüquqlarının və sosial ədalət prinsiplərinin təmin olunması istiqamətində görülən işlərdən bəhs etmiş, təhsil işçilərinin hüquq və qanuni mənafelərinin müdafiəsində həmkarlar ittifaqlarının rolunu diqqətə çatdırmışlar.
Keçirilən tədbirlərdə üzv təşkilatların nümayəndələri, o cümlədən hüquq və texniki əmək müfəttişləri olmaqla, ümumilikdə 40–50 nəfər iştirak etmişdir. Görüşlərin təşkilində ilk həmkarlar ittifaqı təşkilatlarına komitə tərəfindən təşkilati dəstək göstərilmişdir.
Eyni zamanda, ittifaq üzvlərinin “Layiqli əmək şəraitinin qiymətləndirilməsi” mövzusunda ictimai rəy sorğusunda iştirakının təmin edilməsi məqsədilə müvafiq məlumatlandırma işi aparılmışdır.
ETİHİ Astara Rayon Komitəsi bundan sonra da təhsil işçilərinin əmək və sosial hüquqlarının müdafiəsi, layiqli əmək şəraitinin təmin olunması, əməyin mühafizəsi və müəllim əməyinə verilən dəyərin artırılması istiqamətində məqsədyönlü fəaliyyətini davam etdirəcəkdir.





















