Xəbərlər
ADPU-da Müəllimlər Günü qeyd olundu

Azərbaycan Dövlət Pedaqoji Universitetində (ADPU) 5 Oktyabr – Beynəlxalq Müəllimlər Günü münasibətilə tədbir keçirilib. Tədbirdə ADPU-nun professor-müəllim heyəti, əməkdaşları, tələbələri, məzunları və qonaqlar iştirak ediblər.
Tədbir Ümummilli Lider Heydər Əliyevin və Azərbaycan Respublikasının müstəqilliyi, suverenliyi və ərazi bütövlüyü uğrunda şəhid olmuş həmvətənlərimizin xatirəsinin bir dəqiqəlik sükutla yad edilməsi ilə başlayıb. Ardınca Azərbaycan Respublikasının Dövlət Himni səsləndirilib.
Tədbirin açılışında ADPU-nun Xor kollektivinin ifasında universitetin müəllimi olmuş görkəmli bəstəkar Nailə Mirməmmədlinin “Müəllim” əsəri təqdim olunub.
Tədbiri giriş sözü ilə açan ADPU-nun rektoru professor Cəfər Cəfərov professor-müəllim heyətini, tələbələri və iştirakçıları Beynəlxalq Müəllimlər Günü münasibətilə təbrik edib. O, müəllimliyin yalnız bilik ötürmək deyil, insanın düşüncəsinə və dünyagörüşünə təsir edən, cəmiyyətin inkişafına töhfə verən məsuliyyətli peşə olduğunu vurğulayıb. Müasir dövrdə rəqəmsallaşma və süni intellektin müəllim qarşısında yeni tələblər yaratdığını qeyd edən rektor daim yenilənməyin vacibliyini diqqətə çatdırıb.
ADPU-nun 105 illik tarixindən danışan prof. C.Cəfərov universitetin müəllim hazırlığında mühüm rolunu qeyd edib. O, yüksək nəticə göstərən gənclərin müəllimlik peşəsinə marağının artdığını bildirərək məktəblərlə əməkdaşlığın genişləndirilməsi, pedaqoji təcrübənin gücləndirilməsi və elmi tədqiqatların məktəbin ehtiyaclarına uyğunlaşdırılmasını əsas prioritetlər kimi göstərib.
Tədbirdə çıxış edən Elm və Təhsil İşçiləri Həmkarlar İttifaqı Respublika Komitəsinin sədri, ADPU-nun Tarix fakültəsinin 2004-cü il məzunu Araz Paşayev müəllimlik peşəsinin cəmiyyətin inkişafındakı mühüm rolundan danışıb, müəllimlərin gələcək nəslin formalaşmasında böyük məsuliyyət daşıdığını vurğulayıb. O bildirib ki, müəllim yalnız bilik verən deyil, eyni zamanda gənclərin dünyagörüşünün, vətəndaşlıq mövqeyinin və həyata baxışının formalaşmasına təsir göstərən şəxsdir.
Müəllim əməyinin nəticəsinin illər sonra özünü göstərdiyini qeyd edən Araz Paşayev bu peşənin böyük məsuliyyət və fədakarlıq tələb etdiyini vurğulayıb.
ADPU-nun məzunu kimi universitetlə bağlı xatirələrini bölüşərək tələbəlik illərinin onun həyatında mühüm iz buraxdığını bildirib. O, doğma universitetdə, müəllim yetişdirən bu ali təhsil ocağında Beynəlxalq Müəllimlər Günü münasibətilə keçirilən tədbirdə iştirakından məmnunluğunu ifadə edib.
Tədbirin sonunda müxtəlif illərdə universitetin ayrı-ayrı fakültələrindən məzun olmuş əməkdaşlar səhnəyə dəvət edilib, tələbəlik illəri, müəllimləri və doğma universitetlə bağlı xatirələrini tədbir iştirakçıları ilə bölüşüblər.














