Xəbərlər
Ağdaşda ali məktəblərə qəbul imtahanlarında yüksək nəticə göstərmiş məzunlarla görüş keçirilib.

Avqustun 31-də Ağdaş Rayon İcra Hakimiyyətində 2026-cı ildə ali məktəblərə qəbul imtahanlarında 600 və daha yüksək bal toplamış məzunlarla görüş keçirilib.
Tədbirdə Ağdaş Rayon İcra Hakimiyyətinin başçısı, aparatın məsul əməkdaşları, Rayon Təhsil Sektorunun müdiri, Elm və Təhsil İşçiləri Həmkarlar İttifaqı Ağdaş Rayon Komitəsinin sədri, direktor və ali məktəblərə qəbul imtahanlarında yüksək nəticə göstərmiş məzunlar iştirak ediblər.
Tədbiri giriş sözü ilə açan Ağdaş Rayon İcra Hakimiyyətinin başçısı Orxan Hüseynzadə məzunları təbrik edərək, onlara gələcək təhsil həyatlarında uğurlar arzulayıb. Dövlətin təhsil sahəsinə göstərdiyi diqqət və qayğıdan, Prezident İlham Əliyevin rəhbərliyi ilə bu istiqamətdə həyata keçirilən tədbirlərdən bəhs edib.
Yüksək nəticə göstərən məzunlar çıxışlarında qazandıqları uğurlardan və gələcək hədəflərindən bəhs edərək onlara göstərilən diqqət və qayğıya görə minnətdarlıqlarını ifadə ediblər.
Daha sonra ali məktəblərə qəbul imtahanlarında 600 və daha yüksək bal toplamış məzunlara “Fəxri Fərman” və hədiyyələr təqdim olunub, xatirə şəkli çəkdirilib.





















