Xəbərlər
Astara rayonunda Ümummilli Lider Heydər Əliyevin 103-cü ildönümünə həsr olunmuş futbol yarışı keçirildi

Elm və Təhsil İşçiləri Həmkarlar İttifaqı Astara Rayon Komitəsinin təşkilatçılığı ilə Azərbaycan xalqının Ümummilli Lideri Heydər Əliyevin anadan olmasının 103-cü ildönümünə həsr olunmuş futbol yarışı keçirilmişdir.
27–28 aprel 2026-cı il tarixlərində baş tutan yarışda Astara rayonunun ümumtəhsil müəssisələrində çalışan ittifaq üzvləri iştirak etmiş, maraqlı və gərgin idman mübarizəsi nümayiş etdirmişlər.
Yarışın yekununda qalib komandalar Elm və Təhsil İşçiləri Həmkarlar İttifaqı Astara Rayon Komitəsi tərəfindən diplomlarla təltif olunmuş, I, II və III yerləri tutan komandaların üzvlərinə, həmçinin hakimlərə hədiyyələr təqdim edilmişdir.
Tədbirin keçirilməsində əsas məqsəd idmanın inkişafı, sağlam həyat tərzinin təşviqi və təhsil işçiləri arasında həmrəyliyin gücləndirilməsi olmuşdur.













