Xəbərlər
Bir ömrə verilən qiymət

Göyçay Peşə Liseyi PHŞ-də uzun illər təhsilə xidmət etmiş dəyərli müəllimlərimizin 65 illik yubileyi münasibətilə çox səmimi, ürəkdən gələn bir tədbir keçirildi. Bu gün sadəcə bir tarix deyildi – bu, illərin zəhmətinə, alın tərinə və minlərlə şagirdin həyatına toxunan bir ömrə verilən qiymət idi.
Tədbirdə liseyin kollektivi və ETİHİ Göyçay Rayon Komitəsinin sədri Kəmalə Səmədova iştirak edərək yubilyar müəllimlərimizi ürəkdən təbrik etdilər. Çıxışlarda keçmiş xatirələr yada salındı, müəllimlərin həyat yolu, sadəliyi, zəhməti və insanlara verdiyi dəyər böyük hörmətlə vurğulandı. Zal bəzən gülümsədi, bəzən kövrəldi… elə ən gözəl tədbirlər də belə olur.
Bu günün qəhrəmanları:
Rəşidov Akif Qəfər, İsayev Elşad Əkbər, Cahangirova Məhbubə Zeynalabdin, Ömərova Məhluqə İsa, Hüseynov Elbrus Sabir, Rüstəmova Validə Adil, Quliyev Mahir Məhəmməd, Məmmədov Tərlan İdris və Əliyev İlqar Yaşar müəllimlərimiz oldu.
Xüsusi olaraq qeyd edildi ki, Məhluqə xanım Vətənimizin azadlığı uğrunda canından keçən qəhrəmanımız Kənanın anasıdır. Bu sözlər səslənəndə zalda tamam başqa bir sükut yarandı… bu, hörmətin, qürurun və minnətdarlığın sükutu idi.
Sonda yubilyar müəllimlərimiz mükafatlar, fəxri fərmanlar və hədiyyələrlə təltif olundular. Amma ən böyük mükafat onların yetişdirdiyi şagirdlər, qazandıqları hörmət və arxada qoyduqları izdir.
65 yaş… bir az rəqəmdir, amma əslində bir məktəbdir.















