Xəbərlər
Goranboy rayonu Hazırəhmədi kənd körpələr evi-uşaq bağçasının kollektivi üçün İsmayıllı rayonuna ekskursiya təşkil olunub

Elm və Təhsil İşçiləri Həmkarlar İttifaqı Goranboy rayon komitəsi tərəfindən 1 avqust 2026-cı il tarixində Goranboy rayonunun Hazırəhmədi kənd körpələr evi-uşaq bağçasının kollektivi üçün İsmayıllı rayonuna birgünlük ekskursiya təşkil olunub. Ekskursiya əməkdaşların asudə vaxtının səmərəli təşkili, mənəvi istirahətlərinin təmin edilməsi, eyni zamanda ölkəmizin zəngin təbiəti və turizm imkanları ilə seçilən İsmayıllı rayonunun görməli məkanları ilə yaxından tanış olmaları məqsədilə həyata keçirilib. Səfər çərçivəsində iştirakçılar İsmayıllı rayonunun füsunkar təbiətini, yaşıllıqlarla əhatə olunmuş istirahət guşələrini və mənzərəli ərazilərini ziyarət ediblər. Rayonun təmiz dağ havası, sakit mühiti və təbii gözəllikləri kollektiv üzvlərinə xoş ovqat bəxş edərək yaddaqalan bir gün keçirmələrinə şərait yaradıb. Ekskursiya iştirakçılar tərəfindən böyük məmnunluqla qarşılanıb. Səfərin sonunda kollektiv üzvləri belə tədbirlərin həm mənəvi istirahətin səmərəli təşkilinə, həm də kollektiv daxilində qarşılıqlı münasibətlərin daha da möhkəmlənməsinə mühüm töhfə verdiyini vurğulayaraq, ekskursiyanın təşkilində əməyi olan hər kəsə təşəkkürlərini bildiriblər.




