Xəbərlər
Goranboy rayonu Sarov kənd körpələr evi-uşaq bağçasının kollektivi üçün Qəbələ rayonuna ekskursiya təşkil olunub

Elm və Təhsil İşçiləri Həmkarlar İttifaqı Goranboy rayon komitəsi tərəfindən 22 avqust 2026-cı il tarixində Goranboy rayonunun Sarov kənd körpələr evi-uşaq bağçasının kollektivi üçün Qəbələ rayonuna birgünlük ekskursiya təşkil olunub. Ekskursiya kollektiv üzvlərinin asudə vaxtının səmərəli təşkili, mənəvi istirahətlərinin təmin olunması və Qəbələ rayonunun zəngin təbiəti, turizm imkanları və görməli məkanları ilə yaxından tanış olmaları məqsədilə həyata keçirilib. Səfər zamanı iştirakçılar Qəbələnin füsunkar təbiət mənzərələrini, yaşıllıqlarla əhatə olunmuş ərazilərini və istirahət guşələrini ziyarət edərək təmiz dağ havasından və bölgənin özünəməxsus gözəlliklərindən zövq alıblar. Təbiət qoynunda keçirilən gəzinti kollektiv üzvlərinə xoş ovqat bəxş edib, onların səmərəli və yaddaqalan istirahətinə şərait yaradıb. Ekskursiya iştirakçılar tərəfindən böyük məmnunluqla qarşılanıb. Kollektiv üzvləri səfərin təşkilinə və göstərilən diqqətə görə təşəkkürlərini bildirərək, bu cür tədbirlərin həm asudə vaxtın faydalı keçirilməsinə, həm də kollektiv daxilində birlik və həmrəyliyin möhkəmləndirilməsinə müsbət təsir göstərdiyini qeyd ediblər.





