Xəbərlər
Qaxda 5 Oktyabr – Beynəlxalq Müəllimlər Günü münasibətilə görüşlər keçirilib

5 Oktyabr – Beynəlxalq Müəllimlər Günü münasibətilə Elm və Təhsil İşçiləri Həmkarlar İttifaqı Respublika Komitəsinin təşəbbüsü ilə Qax rayonunun Uşaq-Gənclər İnkişaf Mərkəzi (UGİM) və Z. Rəhimov adına Qaşqaçay kənd tam orta ümumtəhsil məktəbində müəllimlərlə görüşlər keçirilib.
Görüşlərdə ETİHİ Respublika Komitəsi sədrinin daxili nəzarət və keyfiyyət təminatı üzrə müşaviri Natiq Zamanov, ETİHİ Qax Rayon Komitəsinin sədri Rübail Əfəndiyeva və Qax rayonu üzrə Təhsil sektorunun müdiri Babək Heydərov iştirak ediblər.
Əvvəlcə Qaşqaçay kəndində yerləşən “Şəhidlər qalası” ziyarət olunub, şəhidlərin əziz xatirəsi ehtiramla yad edilib.
Tədbirlər Azərbaycan Respublikasının Dövlət Himninin səsləndirilməsi ilə başlayıb. Ulu Öndər Heydər Əliyevin və Azərbaycanın ərazi bütövlüyü və suverenliyi uğrunda canından keçmiş şəhidlərin əziz xatirəsi bir dəqiqəlik sükutla yad olunub.
Çıxış edənlər müəllimləri 5 Oktyabr – Beynəlxalq Müəllimlər Günü münasibətilə təbrik edərək, müəllimlik peşəsinin cəmiyyətin inkişafında mühüm və şərəfli missiya daşıdığını vurğulayıblar. Qeyd olunub ki, müəllimlər gənc nəslin təlim-tərbiyəsində, onların milli-mənəvi dəyərlər ruhunda formalaşmasında mühüm rol oynayırlar. Müəllimlərə məsuliyyətli və şərəfli fəaliyyətlərində möhkəm cansağlığı, uğurlar və yeni nailiyyətlər arzulanıb.
Dəyirmi masa ətrafında səmimi və işgüzar şəraitdə davam edən görüşlər zamanı müəllimlərin fikir və təklifləri dinlənilib, onları maraqlandıran məsələlər ətrafında fikir mübadiləsi aparılıb.
Tədbir çərçivəsində müəllim kimi fəaliyyət göstərən ittifaq üzvü, şəhid xanımı Elza Omarova və Vətən müharibəsi qazisi Mail Məmmədov təltif ediliblər. Onlara ETİHİ Respublika Komitəsinin hədiyyələri təqdim olunub.
Tədbirdə şəhid Milli Qəhrəman Cavanşir Rəhimovun anası Lalə Rəhimova, eləcə də ittifaq üzvü olan şəhid anaları iştirak ediblər. Şəhid ailələrinə göstərilən diqqət və qayğının əhəmiyyəti vurğulanıb, onların fədakarlığının daim yüksək ehtiramla yad edildiyi bildirilib.
Görüşlərin sonunda müəllimlər göstərilən diqqət və qayğıdan məmnunluqlarını ifadə edərək, onların əməyinə verilən yüksək dəyərə görə Azərbaycan Həmkarlar İttifaqları Konfederasiyasının sədri Sahib Məmmədova və ETİHİ Respublika Komitəsinin sədri Araz Paşayevə öz dərin təşəkkür və minnətdarlıqlarını çatdırmağı Natiq Zamanovdan xahiş ediblər.
























