Xəbərlər
Qaxda 7 oktyabr – Ümumdünya Layiqli Əmək Günü ilə bağlı maarifləndirici tədbirlər keçirilib

Azərbaycan Həmkarlar İttifaqları Konfederasiyası İcraiyyə Komitəsinin 28 iyul 2026-cı il tarixli 16-1/İK-18/2026 nömrəli qərarı ilə təsdiq edilmiş “2026-cı il üzrə BƏT Konvensiyalarının icrası ilə bağlı görüləcək işlərə dair Tədbirlər Planı”na uyğun olaraq, 7 oktyabr – Ümumdünya Layiqli Əmək Günü münasibətilə Qax rayonunda həmkarlar ittifaqı üzv təşkilatlarında silsilə maarifləndirici tədbirlər keçirilib.
Tədbirlər Nizami Gəncəvi adına İlisu kənd tam orta ümumtəhsil məktəbi, M. Mərdanov adına Ağçay kənd ümumi orta ümumtəhsil məktəbi, M. Ə. Sabir adına Güllük kənd tam orta ümumtəhsil məktəbi, A. Abbasov adına Turaclı kənd tam orta ümumtəhsil məktəbi, Ləkit kənd tam orta ümumtəhsil məktəbi, E. Babayev adına Qax şəhər 4 nömrəli tam orta ümumtəhsil məktəbi, V. Əliyev adına Qax şəhər 3 nömrəli tam orta ümumtəhsil məktəbi və Qax şəhər 6 nömrəli Körpələr Evi-Uşaq Bağçasında təşkil olunub.
Maarifləndirici görüşlərin əsas məqsədi əmək hüquqları, layiqli əmək prinsipləri, təhlükəsiz və sağlam əmək şəraitinin təmin olunması, əmək münasibətlərində bərabərlik və ayrı-seçkiliyin yolverilməzliyi barədə işçilərin məlumatlılığının artırılması olub.
Tədbirlər çərçivəsində iştirakçılara əmək hüquqları və layiqli əmək prinsipləri barədə ətraflı məlumat verilib. Çıxışlarda məcburi əməyin yolverilməzliyi, onun müxtəlif formalarının qarşısının alınması, əmək münasibətlərində ayrı-seçkiliyə yol verilməməsi və işçilərin əmək hüquqlarının etibarlı müdafiəsinin təmin olunması məsələləri xüsusi diqqət mərkəzində saxlanılıb.
Maarifləndirmə zamanı yetkinlik yaşına çatmayanların əmək hüquqlarının qorunması məsələlərinə də geniş yer verilib. Bildirilib ki, yetkinlik yaşına çatmayanların gecə əməyinə cəlb olunmasına yol verilmir. Təhsil alan yetkinlik yaşına çatmayanların əmək fəaliyyətinə cəlb edilməsi zamanı onların təhsil hüquqlarının qorunması, qanunvericiliklə müəyyən edilmiş minimum yaş həddinə riayət olunması və uşaq əməyinin qarşısının alınması mühüm şərtlərdəndir.
Eyni zamanda vurğulanıb ki, uşaqların sağlamlığına, təhlükəsizliyinə, mənəvi və fiziki inkişafına zərər vura biləcək işlərə cəlb edilməsinin qarşısının alınması hər bir halda prioritet olmalıdır. Bu istiqamətdə işəgötürənlərin və əmək münasibətlərinin digər iştirakçılarının üzərinə düşən vəzifələr barədə də ətraflı izahat verilib.
Görüşlərdə əmək münasibətlərində bərabər rəftar və ayrı-seçkiliyin yolverilməzliyi məsələsinə də toxunulub. İştirakçıların diqqətinə çatdırılıb ki, işə qəbul, vəzifədə irəli çəkilmə, əmək şəraitinin dəyişdirilməsi və əmək müqaviləsinə xitam verilməsi zamanı ailə vəziyyətinə görə ayrı-seçkiliyə yol verilməsi yolverilməzdir.
Bununla yanaşı, ailə öhdəliklərinin bölüşdürülməsində kişi işçilərin hüquqları, o cümlədən atalıq məzuniyyəti və qanunvericilikdə nəzərdə tutulmuş digər müvafiq təminatlar barədə iştirakçılara məlumat verilib. Ailə və əmək həyatının uzlaşdırılması, işçilərin ailə öhdəlikləri ilə bağlı hüquqlarının təmin olunmasının layiqli əmək prinsiplərinin mühüm tərkib hissələrindən biri olduğu diqqətə çatdırılıb.
Tədbirlər zamanı iştirakçıları maraqlandıran suallar cavablandırılıb, əmək hüquqlarının müdafiəsi, işçilərin hüquqi maarifləndirilməsinin artırılması, təhlükəsiz və sağlam əmək şəraitinin yaradılması, əmək münasibətlərində sosial ədalət və bərabərliyin təmin edilməsi istiqamətində fikir mübadiləsi aparılıb.
Keçirilən maarifləndirici tədbirlər layiqli əmək mədəniyyətinin formalaşdırılması, əmək hüquqları barədə məlumatlılığın artırılması və əmək qanunvericiliyinin tələblərinə əməl olunmasının təşviqi baxımından mühüm əhəmiyyət daşıyıb.
Bu cür tədbirlərin keçirilməsində əsas məqsəd işçilərin əmək hüquqları barədə məlumatlılığını artırmaqla yanaşı, həmkarlar ittifaqlarının əmək hüquqlarının və sosial-iqtisadi maraqların müdafiəsində rolunu daha da gücləndirmək, layiqli əmək prinsiplərinin cəmiyyətin bütün sahələrində təşviqinə töhfə verməkdir. :::






















