Xəbərlər
Salyanda “1 Avqust – Azərbaycan Əlifbası və Azərbaycan Dili Günü” münasibətilə tədbir keçirilib

Salyanda “1 Avqust – Azərbaycan Əlifbası və Azərbaycan Dili Günü” münasibətilə rayon İcra Hakimiyyətinin, YAP Salyan rayon təşkilatının, rayon Heydər Əliyev Mərkəzinin və “Ana Kür” ədəbi məclisinin birgə təşkilatçılığı ilə “Ulu Öndərin dil siyasəti: milli kimliyin qorunması və inkişafı” adlı tədbir keçirilib.
Salyan rayon Heydər Əliyev Mərkəzində keçirilən tədbirdə Salyan Rayon İcra Hakimiyyətinin, YAP Salyan rayon təşkilatının rəhbərliyi, ETİHİ Salyan Rayon Komitəsinin rəhbərliyi, ziyalılar, təhsil işçiləri, şair və yazıçılar, ədəbi məclis üzvləri, gənclər, QHT və ictimaiyyət nümayəndələri iştirak ediblər.
Tədbiri giriş sözü ilə açan Salyan Rayon İcra Hakimiyyəti başçısının müavini Rəşad Cəbrayılov Azərbaycan dilinin xalqımızın milli varlığını və mənəvi dəyərlərini yaşadan mühüm amillərdən biri olduğunu qeyd edib. Bildirilib ki, dil yalnız ünsiyyət vasitəsi deyil, eyni zamanda xalqın tarixini, mədəniyyətini, dünyagörüşünü və milli yaddaşını özündə yaşadan zəngin mənəvi sərvətdir. Azərbaycan dilinin dövlət dili kimi inkişafında və cəmiyyətdə işləkliyinin daha da genişləndirilməsində Ümummilli Lider Heydər Əliyevin həyata keçirdiyi məqsədyönlü siyasətin mühüm rolu olduğu vurğulanıb. Qeyd olunub ki, bu siyasət Prezident İlham Əliyev tərəfindən uğurla davam etdirilir və Azərbaycan dilinin qorunması, inkişafı, elmi əsaslarla öyrənilməsi və gələcək nəsillərə çatdırılması istiqamətində ardıcıl tədbirlər həyata keçirilir.
Yeni Azərbaycan Partiyası Salyan rayon təşkilatının sədri Elmar Əhmədov çıxışında Azərbaycan dilinin dövlətçilik və milli həmrəylik baxımından əhəmiyyətindən danışıb. Bildirib ki, Ulu Öndər Heydər Əliyevin dil məsələsinə xüsusi diqqəti onun milli dövlətçilik konsepsiyasının mühüm istiqamətlərindən biri olub. Azərbaycan dilinin dövlət dili statusunun möhkəmləndirilməsi, ana dilində təhsilin, elmi və ictimai fəaliyyətin inkişaf etdirilməsi xalqımızın milli özünüdərk prosesinə böyük töhfə verib. Natiq Prezident İlham Əliyevin rəhbərliyi ilə Azərbaycan dilinin qorunması və inkişafı istiqamətində görülən işlərin bu siyasi xəttin müasir mərhələdə uğurla davam etdirilməsinin göstəricisi olduğunu qeyd edib.
Tədbirdə həmçinin Azərbaycan Yazıçılar Birliyinin Muğan-Salyan Regional Bölməsinin sədri, yazıçı-publisist Nəbi İbrahimov, “Ana Kür” ədəbi məclisinin sədri, şair-publisist Firdovsi Sarvanlı, şəhər 2 saylı tam orta ümumtəhsil məktəbinin müəllimi, Dilçilik İnstitutunun dissertantı Günel Orucova, tarixçi-tədqiqatçı Sahib Həsənov, şair-publisist Əzizağa Məmmədli, Uşaq-Gənclər İnkişaf Mərkəzinin direktoru Yeganə Cəfərova, Kürqaraqaşlı kənd tam orta ümumtəhsil məktəbinin direktoru Günel Zeynalova, Şirvan-Salyan Regional Gənclər və İdman İdarəsinin Salyan rayonu üzrə gənclər və idman sektorunun baş məsləhətçisi Fariz Sadıqlı və “Ana Kür” ədəbi məclisinin üzvləri çıxış edərək Azərbaycan dilinin zənginliyi, tarixi inkişaf yolu, ədəbi dil normalarının qorunması və gənc nəslin ana dilinə bağlılığının gücləndirilməsinin vacibliyindən danışıblar.
Eyni zamanda Kürqaraqaşlı kənd tam orta ümumtəhsil məktəbinin VIII sinif şagirdi Şahinə Güləliyevanın ana dilinə həsr olunmuş şeir ifası tədbirə xüsusi rəng qatıb. Gənc şagirdin duyğulu ifası iştirakçılar tərəfindən maraqla qarşılanıb.
Sonda tədbir iştirakçıları Azərbaycan dilinin qorunması və inkişaf etdirilməsinin hər bir vətəndaşın üzərinə düşən mühüm vəzifə olduğunu vurğulayıblar.











