Xəbərlər
Salyanda Sülh aylığı çərçivəsində “Gələcəyin sülhsevər vətəndaşı, müəllim missiyası” adlı dəyirmi masa keçirilib

4 sentyabr 2026-cı il tarixində Şirvan-Salyan Regional Təhsil İdarəsinin Salyan rayonu üzrə Təhsil sektorunda Beynəlxalq Sülh Günü münasibətilə “Sülh aylığı” çərçivəsində “Gələcəyin sülhsevər vətəndaşı, müəllim missiyası” adlı dəyirmi masa keçirilib.
Salyan Rayon İcra Hakimiyyətinin, Yeni Azərbaycan Partiyası Salyan rayon təşkilatının və Elm və Təhsil İşçiləri Həmkarlar İttifaqı Salyan rayon komitəsinin birgə təşkilatçılığı ilə keçirilən tədbirdə əvvəlcə Ümummilli Lider Heydər Əliyevin və Azərbaycanın ərazi bütövlüyü və suverenliyi uğrunda canlarından keçmiş şəhidlərin əziz xatirəsi bir dəqiqəlik sükutla yad edilib.
Dəyirmi masada Salyan Rayon İcra Hakimiyyəti başçısı aparatının Ərazi-təşkilat və ictimai-siyasi məsələlər şöbəsinin ictimai-siyasi və humanitar məsələlər sektorunun müdiri Məhərrəm Məmmədov, YAP Salyan rayon təşkilatının sədr müavini Aqşin Babayev, ETİHİ Salyan Rayon Komitəsinin sədri Aynur Əsgərova, Şirvan-Salyan Regional Təhsil İdarəsinin Tədrisin Keyfiyyəti sektorunun aparıcı məsləhətçisi, 44 günlük Vətən müharibəsi iştirakçısı Vüqar Qələşov, Marışlı kənd tam orta məktəbinin hərbi rəhbəri, II Qarabağ müharibəsi qazisi Faiq Abdullayev və şəhid anası Zenfira Vəliyeva çıxış edərək sülhün əhəmiyyəti, gənc nəslin sülh və həmrəylik ruhunda tərbiyə olunması, müəllimlərin bu istiqamətdə üzərinə düşən mühüm vəzifələr, eləcə də ölkəmizdə sülh və sabitliyin təmin olunması istiqamətində həyata keçirilən tədbirlər barədə fikirlərini bildiriblər. Çıxışlarda şagirdlərə sülh, qarşılıqlı hörmət, humanizm və həmrəylik dəyərlərinin aşılanmasında təhsil və müəllim amilinin xüsusi rolu vurğulanıb. Həmçinin gələcək nəsillərin sülhsevər vətəndaş kimi formalaşdırılmasının cəmiyyətin davamlı inkişafı baxımından mühüm əhəmiyyət daşıdığı qeyd olunub.













