Xəbərlər
Şəhid Famil Əhmədzadənin anadan olmasının 51-ci ildönümü qeyd edilib

Vətən müharibəsinin şəhidi, E. Məmmədov adına İsmayıllı şəhər 3 saylı məktəb liseyin tarix müəllimi Famil Əhmədzadənin anadan olmasının 51-ci ildönümü qeyd edilib.
Tədbirdə YAP Rayon təşkilatının əməkdaşları, şəhər 1 və 3 nömrəli, Mücühəftəran kənd tam orta ümumtəhsil məktəblərinin bir qisim müəllim-şagird heyəti iştirak edib.
Tədbir iştirakçıları Famil Əhmədzadə haqqında xoş xatirələrini bölüşüb, məktəblilərin ifasında şerlər səsləndirilib.
Elm və Təhsil İşçiləri Həmkarlar İttifaqı İsmayıllı rayon komitəsinin sədri Hafiz Kərimov və İsmayıllı rayon təhsil sektorunun müdiri Rəşid Məmmədov Famil Əhmədzadənin ev muzeyini və məzarını ziyarət edib gül dəstələri qoyublar.
Xatırladaq ki, Famil Ağaəhməd oğlu Əhmədzadə 23 sentyabr, 1975-ci ildə Bakı şəhəri Xətai rayonunda anadan olub. Ailəsi İsmayıllıya köçdüyünə görə Famil 1982-ci ildə İsmayıllı şəhər 3 nömrəli tam orta məktəbin birinci sinfinə gedib.
1997-ci ildə məzunu olduğu İsmayıllı şəhər 3 nömrəli məktəb-liseydə tarix müəllimi kimi pedaqoji fəaliyyətə başlayıb. 1999-cu ilin əvvələrində Naxçıvan Muxtar Respublikasına hərbi xidmətə yollanıb. 2000-ci ilin 9 noyabrında hərbi xidmətdən baş leytenant kimi tərxis olunub. Hərbi xidmətdən sonra yenidən doğma məktəbində pedaqoji fəaliyyətini davam etdirib. Famil Əhmədzadə rayonda, eləcə də respublikada ən yaxşı müəllim kimi tanınıb. Onun bir müəllim kimi ən böyük arzusu vətənə layiqli vətəndaşlar yetişdirmək olub.
Famil Əhmədzadə 2020-ci ilin 27 sentyabrında – Vətən müharibəsi başlanan gün könüllü olaraq cəbhəyə yollanıb. Ürəyində böyük vətən sevgisi yaşadan cəsur zabit, müəllim Tərtər rayonunun Talış və Suqovuşan kəndlərinin müdafiəsində müstəsna rol oynayıb. Oktyabr ayının 13-dən 14-nə keçən gecə Talış və Suqovuşanda gedən döyüşlərdə qəhrəmancasına şəhid olub. Şəhid Famil Əhmədzadənin nəşi noyabrın 3-də əvvəlcə yaşadığı evə, daha sonra İsmayıllı rayonu Şəhidlər Xiyabanına gətirilərək, şəhər sakinlərinin izdihamlı yürüşü ilə dəfn edilib.
Allah rəhmət eləsin.






