Xəbərlər
Şəmkirdə Zəfər Gününə həsr olunmuş tədbir keçirilib!

05.11.2025-ci il tarixində 8 Noyabr – Zəfər Günü münasibətilə Elm və Təhsil İşçiləri Həmkarlar İttifaqı Şəmkir Rayon Komitəsinin və Qazax-Tovuz Regional Təhsil İdarəsinin birgə təşkilatçılığı ilə tədbir keçirilib.
Tədbirdə Qazax-Tovuz Regional Təhsil İdarəsinin
müdiri Vüqar Dadaşov, YAP Şəmkir rayon təşkilatının sədri Fəxrəddin Vəliyev, Şəmkir
Rayon İcra Hakimiyyətinin Vətən Müharibəsi İştirakçıları və Şəhid Ailələri ilə
İşin Təşkili şöbəsinin müdiri Sərdar Namazov, Elm və Təhsil İşçiləri Həmkarlar
İttifaqı Şəmkir Rayon Komitəsinin sədri Amin Alıyev və Şəmkir rayonu üzrə təhsil
sektorunun müdiri Elşən Ələsgərov, ümumtəhsil, məktəbəqədər və məktəbdənkənar təhsil
müəssisələrində çalışan Qazilər və Şəhid ailələrinin üzvləri iştirak ediblər.
Tədbir şəhidlərimizin əziz xatirəsinin bir dəqiqəlik
sükutla yad edilməsi və Dövlət Himnimizin səsləndirilməsi ilə başlayıb.
Çıxışlarda vurğulanıb ki, 8 Noyabr – Zəfər
Günü xalqımızın milli qürur və birlik rəmzidir. Bildirilib ki, torpaqlarımızın
azadlığı uğrunda canından keçən şəhidlərimizin xatirəsi hər zaman hörmətlə
anılacaq.
Tədbir zamanı şagirdlərin ifasında səslənən
şeir, rəqs və musiqili kompozisiyalar Zəfərin ucalığını, xalqımızın qəhrəmanlıq
ruhunu və vətənə sevgisini ifadə edib.
Tədbir çərçivəsində Elm və Təhsil İşçiləri Həmkarlar
İttifaqı Şəmkir Rayon Komitəsi tərəfindən iştirakçılara Zəfər rəmzi olaraq Azərbaycan
bayrağı hədiyyə edilib. Bu addım Qələbəmizin və milli həmrəyliyimizin simvolu
kimi böyük rəğbətlə qarşılanıb.
Tədbir iştirakçıları belə vətənpərvərlik
görüşlərinin təşkilinə görə Təşkilatçılara və əməyi keçən hər kəsə təşəkkürlərini
bildiriblər.
Qəhrəman xalqımızın Zəfər Günü mübarək!























































