Xəbərlər
Siyəzən rayon Yenikənd kənd tam orta məktəbi

29 aprel tarixində Elm və Təhsil İşçiləri Həmkarlar İttifaqı Siyəzən Rayon Komitəsinin sədri Gülər Babayeva, Quba-Xaçmaz Regional Təhsil İdarəsi Siyəzən Sektorunun müdiri Elşad Sultanov və Siyəzən rayonu üzrə təhsil sektorunun məsləhətçisi Nəcəf Manafov Siyəzən rayon Yenikənd kənd tam orta məktəbində olublar.
Onlar məktəbin IX sinif şagirdi Qurbanlı Əsmanın Respublika Fənn Olimpiadasında tarix fənni üzrə III yerə layiq görülməsi münasibətilə Əsmanı və onun tarix müəllimi Lalə Səfərovanı təbrik edərək bu uğuru yüksək qiymətləndiriblər.
Görüş zamanı məktəb kollektivi ilə səmimi fikir mübadiləsi aparılıb, əldə olunan nailiyyətin əhəmiyyəti vurğulanıb və gələcək hədəflər ətrafında müzakirələr aparılıb. Bildirilib ki, bu cür uğurlar həm məktəbin, həm də rayon təhsilinin inkişafında mühüm rol oynayır.
Məktəbin direktoru Şahin Səfərov çıxış edərək kollektivin əzmlə fəaliyyət göstərdiyini qeyd edib, qazanılan nailiyyətlərin davamlı olacağına və gələcəkdə daha böyük uğurların əldə ediləcəyinə əminliyini ifadə edib.
Sonda Elm və Təhsil İşçiləri Həmkarlar İttifaqı Siyəzən Rayon Komitəsi tərəfindən Lalə Səfərova təşəkkürnamə ilə təltif olunub, Lalə müəlliməyə və Qurbanlı Əsmaya gül dəstələri təqdim edilib.









