Xəbərlər
Yeni tədris ili ərəfəsində şəhid ailəsi ziyarət edilib.

14 sentyabr 2026-cı il tarixində ETİHİ Salyan Rayon Komitəsinin təşkilatçılığı ilə şəhid baş leytenant Əlisahib Selman oğlu Ələkbərovun ailəsi ziyarət olunub.
Əlisahib Ələkbərovun şəhadətindən bir neçə ay sonra dünyaya göz açan övladı Əlisahibin bu tədris ilində təhsil həyatına başlaması münasibətilə ETİHİ Salyan Rayon Komitəsinin sədri Aynur Əsgərova, Salyan rayonu üzrə Təhsil Sektorunun müdiri Razıgül Dadaşova və Salyan Rayon İcra Hakimiyyətinin ictimai-siyasi və humanitar məsələlər sektorunun aparıcı məsləhətçi psixoloqu Sevinc Səmədova şəhidin ailəsinə baş çəkərək onun əmanətini təbrik edib, ona xoş arzularını çatdırıblar.
Onlar qeyd ediblər ki, bu sadəcə bir uşağın məktəb həyatına başlaması deyil, bu Vətən uğrunda canından keçmiş qəhrəmanımızın bizə əmanət qoyduğu övladının yeni həyat yoluna atdığı ilk addımdır.
Öz balaca ürəyində atasının müqəddəs xatirəsi ilə yanaşı, Vətən sevgisi, qürur və böyük arzular daşıyan körpə Əlisahibə uğurlu təhsil həyatı və parlaq gələcək arzulayan komitə sədri ona hədiyyə təqdim edib.




