Xəbərlər
Yevlax Şəhər İcra Hakimiyyətinin Başçısı şəhid övladını ilk dərsə aparıb
Yevlax Şəhər İcra Hakimiyyətinin Başçısı şəhid övladını ilk dərsə aparıb
15 Sentyabr - Bilik Günü olkəmizin hər yerində olduğu kimi Yevlax rayonunun da böyük təntənə ilə qeyd olunur.
Yeni tədris ilinin başlanması ilə əlaqədar hər il Yevlax Şəhər İcra Hakimiyyətinin məsul şəxsləri vətənimizin azadlığı uğrunda canlarından keçmiş şəhidlərimizin birinci sinifə gedən övladlarını ilk dərsə aparır, onları sevindirirlər. Bu ənənə 2026-2027-ci tədris ilində də davam etdirilib.
Yevlax Şəhər İcra Hakimiyyətinin Başçısı Anar Tağıyev 44 günlük Vətən müharibəsində şəhidlik zirvəsinə ucalmış Kazımov Emin Fərman oğlunun birinci sinfə gedən övladı Fərman Kazımlını Yevlax şəhərindəki Səməd Vurğun adına 5 nömrəli tam orta ümumtəhsil məktəbinə ilk dərsə aparıb.
Əsaslı şəkildə yenidən qurularaq bu il istifadəyə verilən Yevlax şəhər Səməd Vurğun adına 5 nömrəli tam orta ümumtəhsil məktəbdə keçirilən tədbirdə Yevlax Şəhər İcra Hakimiyyətinin Başçısı məktəb kollektivini, şagirdləri və valideyinləri yeni tədris ilinin başlanılması münasibətilə təbrik edərək yeni-yeni nailiyyətlər arzulayıb. İcra Hakimiyyətinin Başçısı dövlətimizin və ölkə rəhbərliyinin şəhid ailələrinə göstərdiyi yüksək diqqət və qayğıdan danışıb, Fərman Kazımlıya atasının adına layiq övlad olmasını, təhsilində uğurlar qazanmasını arzulayıb.
Yevlax Şəhər İcra Hakimiyyəti Başçısı aparatının məsul şəxsləri Şəhidlərimizin birinci sinifə gedən övladlarını ilk dərsə aparıblar.
Belə ki, Şəhər İcra Hakimiyyəti Başçısının birinci müavini Xaliq Əliyev 44 günlük Vətən müharibəsi Şəhidi Salahov Kamil Mətləb oğlunun birinci sinfə gedən övladı Tunar Salahzadəni Aran qəsəbə 2 nömrəli tam orta ümumtəhsil məktəbinə, Yevlax Şəhər İcra Hakimiyyəti Başçısının müavini-Ərazi-təşkilat və ictimai-siyasi məsələlər şöbəsinin müdiri Elnarə Əzizova rayonun 44 günlük Vətən müharibəsi Şəhidi Rəsulov Xəzər Mayıl oğlunun övladı Ömər Rəsulovu Xanabad kənd tam orta məktəbinə, Yevlax Şəhər İcra Hakimiyyəti Başçısı aparatının Hüquq və kadr məsələləri sektorunun müdiri Vidadi Murtuzayev 44 günlük Vətən müharibəsi zamanı Şəhidi Bahadurzadə Vüqar Məmməd oğlunun övladı Mələk Bahadurzadəni Malbinəsi kənd tam orta ümumtəhsil məktəbinə ilk dərsə aparıblar.
Yevlax Şəhər İcra Hakimiyyəti Başçısının müavini-Ərazi-təşkilat və ictimai-siyasi məsələlər şöbəsinin müdiri Elnarə Əzizova və Yevlax Şəhər İcra Hakimiyyəti Başçısı aparatının Ərazi-təşkilat və ictimai-siyasi məsələlər şöbəsinin müdir müavini- Müharibə iştirakçıları və şəhid ailələri ilə işin təşkili sektorunun müdiri Vasif İsayev, sektorun məsul əməkdaşları Hikmət Kazımlı və Etibar Misirov birinci sinfə getmələri münasibətilə 44 günlük Vətən Müharibəsinin Yevlax rayonundan olan Şəhidləri Budaqov Rəşad Ramiz oğlunun övladı Budaqova Milay Rəşad qızını, Paşayev Əvəz Telman oğlunun övladı Paşayeva Gülnaz Əvəz qızını yaşadıqları Mingəçevir şəhərində, Amanov Əhməd Tahir oğlunun övladı Amanov Tahir Əhməd oğlunu isə yaşadığı Salahlı kəndində ziyarət ediblər.
Şəhidlərin ailə üzvləri onlara göstərilən diqqət və qayğıya görə Möhtərəm Prezidentimiz, Müzəffər Ali Baş Komandanımız cənab İlham Əliyevə və Birinci vitse-prezidentimiz hörmətli Mehriban xanım Əliyevaya öz minnətdarlıqlarını bildiriblər.



